इटहरी : नेपाली कांग्रेस इटहरीले एकताको सन्देश दिएको छ । सोमबार (आज) नवनिर्वाचित पदाधिकारीहरूलाई प्रमाणपत्र वितरण कार्यक्रममा कांग्रेसले एकताको सन्देश दिएको हो ।
कांग्रेस इटहरी उपमहानगरपालिकाका नवनिर्वाचित सभापति हेमकर्ण पौडेलले आफू गुटभन्दा माथि रहेर पार्टीलाई एक बनाउने सन्देश दिए ।
उनले भने, ‘हिजो चुनावको दिनमा जे भएपनि हामी एक हुनुपर्छ, पार्टी भन्दा माथि कोही पनि हुँदैन ।’ उनले कार्यकर्ताहरू एकआपसमा मनमुटाव नगरी मिलेर अगाडि बढ्नुपर्ने बताए । आगामी स्थानीय तहको निर्वाचनमा इटहरीमा कांग्रेसलाई विजयी बनाउनका लागि पार्टीका सबै मानिसहरू एक हुनुको विकल्प नरहेको उनको भनाई छ ।
‘सबै साथीहरूले अहंकार र घमण्ड त्याग्न आवश्यक छ, सबैले हातेमालो गरेर इटहरीको भविष्य निर्धारण गर्न जरूरी छ,’ उनले भने, ‘हामीले कम्युनिष्टको चुनौतीलाई जित्नका लागि पनि एक हुन आवश्यक छ ।’
कार्यक्रममा सभापतिका प्रत्यासी विकास केसीले कुनै एक व्यक्तिले सभापतिमा जितेपनि समग्र कांग्रेसको जीत भएको सन्देश दिए । ‘हाम्रो उदेश्य भनेको अब स्थानीय निर्वाचनमा कांग्रेसलाई जिताउनु हो,’ केसीले कार्यक्रममा सम्बोधन गर्दै भने, ‘अबको नेतृत्वले गुट भन्दा माथि रहेर पार्टी एकीकृत बनाउन आवश्यक छ, इटहरीमा पार्टी अफिसको पनि खाँचो छ ।’
उनले आफू चुनावमा पराजित भएपनि जितेकै सो सरह पार्टीका निम्ति निरन्तर खट्ने प्रतिबद्वता व्यक्त गरे । उनले भने, ‘पार्टी अफिस बनाउने कुरादेखि सबै क्षेत्रमा मेरो साथ रहन्छ, पार्टी एकढिक्का बनाउने कुरामा हामी प्रतिबद्व छौँ ।’
‘सबै साथीहरूले अहंकार र घमण्ड त्याग्न आवश्यक छ, सबैले हातेमालो गरेर इटहरीको भविष्य निर्धारण गर्न जरूरी छ,’ उनले भने, ‘हामीले कम्युनिष्टको चुनौतीलाई जित्नका लागि पनि एक हुन आवश्यक छ ।’
नेविसंघका केन्द्रीय अध्यक्ष राजीव ढुंगानाले चुनाव लोकतान्त्रिक प्रक्रिया भएकाले जीत हारभन्दा पनि सबै एक हुनुपर्ने बताए । उनले आगामी निर्वाचनमा देशभर नै कांग्रेस एक भएर एकताको सन्देश दिन आवश्यक रहेको उदृत गरे ।
कांग्रेस क्षेत्रीय सभापति मणिराम श्रेष्ठले इटहरीमा नयाँ नेतृत्वले रचनात्मक काम गर्न आवश्यक रहेको बताए । उनले कांग्रेसीहरूले एकअर्कामा प्रतिशोधको भावना राखेर भन्दा पनि एकताको सन्देश दिनुपर्नेमा जोड दिए ।
असोज ९ गते शनिबार भएको निर्वाचनमा इटहरी कांग्रेसमा पुनः हेमकर्ण पौडेल विजयी भएका छन् । उनीसँगै उपसभापतिमा कोविदजंग कार्की, बालकृष्ण विष्ट, सचिवमा विक्रम घिमिरे, मन्दिप भट्टराई, सहसचिवमा मेनुका गिरी र ईश्वर तामाङ निर्वाचित भएका थिए ।
नवनिर्वाचितहरूलाई निर्वाचन अधिकृत सृर्जना नेपालले प्रमाण पत्र प्रदान गरेकी थिइन् ।
Discussion about this post