प्रतिपक्षी नआएपछि प्रदेशसभाको बैठक स्थगित, मुख्यमन्त्री राईले बुधबार विश्वासको मत लिने

इटहरी : प्रदेश १ मा मंगलबार बसेको प्रदेशसभा बैठक दुई मिनेटमै स्थगित भएको छ । प्रतिपक्षी दल नेकपा एमालेका सांसद उपस्थित नभएपछि सभामुख प्रदीपकुमार भण्डारीले प्रदेशसभाको बैठक दुई मिनेटमै स्थगित गरेका हुन् ।

मंगलबार मुख्यमन्त्री राजेन्द्र राईले विश्वासको मत लिने कार्यसूची रहेको बैठक प्रमुख प्रतिपक्ष दल नेकपा एमाले सांसदहरू उपस्थित नभएपछि सभामुखले साढे २ मिनेट .मै स्थगित गरेका हुन् ।

उनले, बुधबार बस्ने बैठकमा प्रतिपक्षी दलका सांसदहरूलाई उपस्थितिका लागि आग्रह समेत गरेका छन् । .बुधबार बिहान साढे ११ बजेसम्मका लागि बैठक स्थगित गरिको हो । एमालले भने नेत्रविक्रम चन्द विप्लव नेतृत्वको नेपाल कम्युनिष्ट पार्टीले मूल्यवृद्विको विरुद्व आह्वान गरेको नेपाल बन्दको कारण देखाउँदै एमालले बैठक स्थगितका लागि माग राखेको थियो ।

एमाले बैठकमा सहभागी नभएपछि मुख्यमन्त्री राजेन्द्र राईले सभामुख प्रदीपकुमार भण्डारीले तटस्थ भूमिका निर्वाह नगरेको आरोप लगाएका छन् । उनले भने, ‘हामीलाई एक–दुई दिन ढिलो हुँदा के हुन्छ र ? विश्वासको मत पाउँछौँ नै ।’ विशेष कारण नपरी यसरी बैठक स्थगित गरेर समयको नाश र दुःख दिनेबाहेक केही नभएको उनको भनाई छ ।

सभामुख भण्डारीले जहिले पनि ४१ जना भनेर गनेको भन्दै मुख्यमन्त्री राईले निर्णायक अवस्थाबाहेक सभामुखले मत दिनै नपाउने हुँदा पनि सधैँ आफूलाई प्रतिपक्षी सांसद्कै रूपमा गनेकोमा समेत उनको आपत्ति थियो । बन्दको कारण देखाएर बैठक सार्न गरिएको मागप्रति मुख्यमन्त्री राईले समय बर्बाद गर्न र दुःख दिन खोजेको बताएका छन् ।

तत्कालीन मुख्यमन्त्री भीम आचार्यले पदबाट राजीनामा दिएपछि नेकपा एकीकृत समाजवादीका नेता राईको नेतृत्वमा कात्तिक १६ मा नयाँ प्रदेश सरकार बनेको थियो । मंगलबार विश्वासको मत लिएपछि मात्रै प्रदेशमा मन्त्रिमण्डल विस्तार गर्ने तयारीमा सरकार रहेको थियो । तर, मंगलबार विश्वासको मतका लागि बैठक नै नचलेपछि बुधबार मात्रै विश्वासको मत लिने राईले बताए ।

पाँच दलीय सत्ता गठबन्धनमा ५० सांसद छन् । ९३ सदस्य रहेको प्रदेशसभामा हाल कायम संख्या ९२ छ । गठबन्धनमा कांग्रेसका २१, माओवादी केन्द्रका १५, नेकपा एकीकृत समाजवादीका १०, जसपाका ३ र संघीय लोकतान्त्रिक मञ्चका १ गरी ५० सांसद छन् ।

एमालेसँग ४१ सांसद छन् । एक जना सभामुख र एक जना फरार सांसद घटाउँदा एमालेको मत संख्या ३९ मात्रै हुन्छ । त्यसैले सत्ता गठबन्धनले सजिलै विश्वासको मत आर्जन गर्ने अवस्था छ ।