इटहरी : नेपाली कांग्रेसका उपसभापति विजयकुमार गच्छदारको निर्वाचन क्षेत्र, सुनसरी क्षेत्र नं. ३ मा निर्वाचन अधिकृतको राजीनामा माग गरिएको छ ।
गच्छदारले सहमतिमा पदाधिकारी तथा महाधिवेशन छानिनुपर्ने भन्दै निर्वाचनको मिति सार्न निर्देशन दिदैँ आएका थिए । सुनसरीका अन्य तीनवटै निर्वाचन क्षेत्रमा गत मंगलबार नै निर्वाचन भइसकेको छ । तर, सुनसरी क्षेत्र ३ मा भने अझैसम्म निर्वाचन नभएपछि निर्वाचन अधिकृत असक्षम रहेको भन्दै राजीनामा माग गरिएको हो ।
महाधिवेशन प्रतिनिधिका उमेद्वार समेत रहेको कांग्रेस इटहरीका नेता प्रदीप अधिकारीका अनुसार निर्वाचन अधिकृत देवनारायण यादवको असक्षमताका कारण अझैसम्म निर्वाचन नहुँदा उदेद्वारहरू निराश बनेका छन् ।
‘निर्वाचन अधिकृतको असक्षमताका कारण यतिका दिनसम्म निर्वाचन भएको थिएन, अहिले कोही पनि मतदाता नभएको बेला निर्वाचन गर्ने तयारी भएकाले हामीले राजीनामा माग गरेका हौं,’ अधिकारीले टाकुरासँग भने, ‘हिजो मतदाता र उमेद्वार हुँदा आजलाई मिति सारियो, आज पनि अहिलेसम्म चुनाव सुरू नहुँदा न मतदाता छन्, न उमेद्वार नै ।’
उनका अनुसार अहिलेसम्म बिहीबार बिहान ११ बजेसम्म चुनाव नभएपछि उपस्थित उमेद्वारहरूले निर्वाचन सार्नका लागि माग राख्दै निर्वाचन अधिकृतको समेत राजीनामा माग गरेका छन् ।
‘अब चुनाव हुने वातावरण छैन, उमेद्दार र भोटर नभएको बेलामा कसरी चुनाव हुन्छ ?’ अधिकारीले भने ।
उनका अनुसार दुहवी रंगशालामा हुन लागेको निर्वाचनमा अहिले सुरक्षाकर्मी थप गरिएको छ । माहोल अशान्त बनेपछि नेपाल प्रहरी र सशस्त्र प्रहरीलाई सुरक्षामा खटाइएको छ ।
निर्वाचनमा सहमतिको प्रयास खोजिएपनि सभापति पदका लागि तीनजनाको उमेद्वारी परेको छ । सभापतिका लागि मेहन्दि हुसैन, प्रदीप चौधरी र सत्यनारायण गच्छदार चुनावी मैदानमा छन् ।
यस्तै, खुल्लातर्फ १० पदका लागि ३२ जनाको उमेद्वारी परेको छ ।
Discussion about this post