इटहरी : नेपाल कम्युनिष्ट पार्टी (एमाले) सुनसरीको सातौँ जिल्ला अधिवेशन पौष २३ते हुने भएको छ ।
पार्टी प्रचारप्रसार उपसमितिले आज (बिहीबार) इटहरीको पार्टी कार्यालयमा पत्रकार सम्मेलनको आयोजना गरी अधिवेशनबारे जानकारी दिएको हो । जिल्ला सदरमुकाम इनरुवास्थित जेल फिल्ड (खेलमैदान) मा हुने अधिवेशनमा दुई हजार प्रतिनिधि सहभागी हुनेछन् ।
अधिवेशनमा जिल्ला कमिटीको आगामी कार्यकालका लागि नेतृत्व निर्माण र राजनैतिक एवम् सांगठानिक अवस्थाको विचार, विमर्श र विश्लेषण गर्ने पार्टी जिल्ला अध्यक्ष खेमराज पोखरेलले जानकारी दिए । उनका अुनसार अधिवेशनलाई पौष २३ गते अध्यक्ष केपी शर्मा ओलीले भर्चुअल रूपबाट उद्घाटन गर्नेछन् ।
प्रचारप्रसार उपसमितिका संयोजक लोकेश निरौलाले जिल्ला अधिवेशनले एकतिहाई महिलाको प्रतिनिधित्व सुनिश्चित गर्दै समावेशिताको सिद्धान्त बमोजिम दलित, आदिवासी जनजाति, मधेसी, मुस्लिम, थारु, अल्पसङ्ख्यक जातिहरूको समेत प्रतिनिधित्व हुने उनले बताए । अधिवेशनले अध्यक्ष, उपाध्यक्ष, सचिव र उप–सचिवसहित एक सय ३५ सदस्य जिल्ला कमिटीको चयन गर्नेछ ।
सांगठानिक तथा आर्थिक प्रतिवेदन तयारीको संयोजकमा पार्टी अध्यक्ष खेमराज पोखरेल, आर्थिक व्यवस्थापनको जिम्मेवारी नीलम खनाललाई दिएको छ । त्यस्तै, मञ्च व्यवस्थापन उपसमितिको जिम्मेवारी शत्रुधनप्रसाद यादवलाई दिइएको छ ।
स्वयमसेवक परिचालन उपसमिति संयोजकमा पदम लिम्बू र अरुण गुरुङलाई तोकिएको छ । खाद्य व्यवस्थापन उपसमितिका लागि पर्शुराम यादव रहेका छन् । प्रतिनिधि व्यवस्थापन उपसमितिमा नन्द बस्नेत र राम कोइराला छन् ।
अतिथि सत्कार उपसमितिमा लिलम बस्नेत र सिर्जना परियार छन् भने प्रचारप्रसार उपसमितिमा लोकेश निरौला र रवी खनाल रहेका छन् । स्वास्थ्य उपसमितिको जिम्मेवारी सुशील अर्याललाई संयोजक तोकिएको छ ।
जिल्ला अधिवेशन प्रतिनिधि छनौट वडा शाखा कमिटीको एकैसाथ पौष १७ गते गरिने तयारी गरिएको छ । वडा तथा कमिटीलाई प्रतिनिधि छनौटको भूगोल मानेर २५ जना सङ्गठित सदस्य बराबर एक जना र प्रत्येक एक जना प्रतिनिधिमा एक जना महिलालाई अनिवार्य गरिएको छ ।
पार्टीको लोगोमा अर्ना
यसैबीच बिहीबार नै अधिवेशनको नयाँ लोगो पनि सार्वजनिक गरिएको छ । लोगोमा नेपालमा सबैभन्दा धेरै अर्ना भएको कोशीटप्पु वन्यजन्तु आरक्षमा पाइने अर्ना प्रयोग गरिएको छ ।
देशकै मात्र नभई अर्ना सबै देश विदेशको आकर्षण भएकाले समावेश गरिएको प्रचारप्रसार उपसमितिका सहसंयोजक रवी खनालले जानकारी दिए ।
Discussion about this post