इटहरी : जिल्ला प्रहरी कार्यालय सुनसरीले २ थान पेस्तोल र ४ राउन्ड गोली सहित चारजना युवालाई पक्राउ गरेको छ।
इनरुवा नगरपालिका क्षेत्रमा हातहतियार सहित केही व्यक्तिहरू रहेको भन्ने गोप्य सूचनाका आधारमा जिल्ला प्रहरी कार्यालय सुनसरीबाट सादा पोसाकमा खटिएको प्रहरी टोलीले चारजनालाई पक्राउ गरेको हो।
पक्राउ पर्नेहरूमा हरिनगर गाउँपालिका ७ घुस्कीका २० वर्षीय सबिर मियाँ, ३१ वर्षीय सवरेज मियाँ, सोही स्थानका २५ वर्षीय सिकन्दर मलाहा र हरिनगर गाउँपालिका ६ का २३ वर्षीय फरियाद अन्सारी रहेका छन् ।
सबिर मियाँलाई बुधवार राति सुनसरीको महेन्द्र चोकबाट पक्राउ गरिएको थियो । मियाँको साथबाट प्रहरीले कटुवा पेस्तोल १ थान, गोली १ राउन्ड, र उनले प्रयोग गर्ने १ थान मोटरसाइकल सहित पक्राउ गरेको हो।
उनकै बयानका आधारमा अन्य व्यक्तिहरू समेत हातहतियार सहित घुमफिर गरिरहेको भन्ने खुल्न आएसँगै तत्काल प्रहरी परिचालन गरी थप तीन जनालाई हतियार सहित पक्राउ गरिएको प्रहरीले जनाएको छ ।
हातहतियारसहित पक्राउ परेका उनीहरूलाई म्याद थप गरी आवश्यक अनुसन्धान भइरहेको प्रहरीले जनाएको छ ।
Discussion about this post