इटहरी : बिभागीय टिम त्रिभुवन आर्मी क्लबले छैठौँ हराईजन राष्ट्रिय बास्केटबल कपमा विजयी सुरुवात गरेको छ ।
धरानमा शबिार (आज) बाट सुरु भएको प्रतियोगिताको उद्घाटन खेलमा आयोजक हराईजन क्लब धरानलाई ८६–१३१ स्कोरले पराजित गर्दै आर्मीले विजयी सुरुवात गरेको हो ।
पहिलो क्वाटर २४–३६, दोस्रो ४५–५९, तेस्रो क्वाटर ६०–९७ स्कोरले जितेको आर्मीले अन्तिम क्वाटरमा ८६ का बिरुद्ध १३१ स्कोर निकाल्दै सहज जीत हात पारेको हो । खेलको म्यान अफ द म्याच डिफेण्डिंग च्याम्पियन आर्मीका निश्चल महर्जन भए । उनले सर्वाधिक २७ अंक जोडेका थिए । चैत ११ गतेसम्म चल्ने प्रतियोगितामा देशभरका ८ वटा टिमको सहभागिता रहेको छ ।
प्रतियोगिताको बिजेताले नगद एक लाख ११ हजार रुपैँया नगद पुरस्कार पाउनेछन् भने उपबिजेताले ५५ हजार रुपैँया पाउने आयोजकले जनाएको छ ।
प्रतियोगितामा गत वर्षको तुलनामा यो वर्ष नगद पुरस्कार राशी थप गरिएको क्लबका अध्यक्ष वसन्त राईले जानकारी दिए ।
अघिल्लो संस्करणमा प्रथम पुरस्कार एक लाख र उपविजेताको पुरस्कार ५० हजार मात्र रहेको थियो । यस्तै, सर्वोत्कृष्ट खेलाडीले नगद ११ हजार पाउनेछन् भने उदयीमान खेलाडीले ५ हजार पाउनेछन् ।
२०६९ सालदेखि सुरु भएको प्रतियोगितामा पहिलो र दोस्रो संस्करणमा आयोजक हराईजन क्लब विजयी भएको थियो भने २०७३ र २०७५ मा इमोर्टल्स क्लब धरान विजयी भएको थियो ।
यसैगरी २०७७ मा नेपाल आर्मी क्लब काठमाण्डौं विजयी भएको थियो ।
Discussion about this post