धरान : छैठौँ हराइजन राष्ट्रिय बास्केटबल कपको उपाधी बिभागीय काठमाण्डौँको टाइम्स क्लबले जितेको छ ।
धरानमा शुक्रबार (आज) सम्पन्न फाइनल खेलमा टाइम्स बास्केटबल क्लबले बिभागीय टिम त्रिभुवन आर्मीमाथि ८१ का बिरुद्ध ७८ स्कोरको जीत दर्ता गर्दै टाइम्सले उपाधी जितेको हो ।
उपाधीसँगै टाइम्सले नगद एक लाख ११ हजार रुपैयाँ पुरस्कार पाएको छ भने उपबिजेता बनेको आर्मी क्लबले ५५ हजारमा चित्त बुझाएको छ । टाइम्सले पत्येक क्वाटरमा १९–१८–१८–२६ स्कोर बनाएको थियो ।
यस्तै, आर्मीले २५–१४–२२–१७ स्कोर बनाएको थियो ।
फाइनल खेलको म्यान अफ द म्याच आर्मीका बिनोद महर्जन भए । प्रतियोगिताको उत्कृष्ट खेलाडी टाइम्सका सदिश प्रधान घोषित भए । उनी राष्ट्रिय टिमका क्याप्टेन समेत हुन् । उनले नगद ११ हजार रुपैयाँ पुरस्कार पाए । यस्तै, उदयमान खेलाडी ब्रदर्श क्लब धरानका कबिन मगर भए । उनले नगद ५ हजार पुरस्कार पाए ।
उद्घाटन खेलमा आयोजक हराइजन क्लब धरानलाई ८६–१३१ स्कोरले पराजित गरेको आर्मीले सेमिफाइनलमा काठमाण्डौँको रोयल्स बास्केटबल क्लबलाई ७९ का बिरुद्ध ९२ स्कोरले पराजित गर्दै उपाधी भिडन्त पक्का गरेको थियो ।
अन्तिम क्वाटरफाइनल खेलमा बिर्तामोड बास्केटबल क्लब झापालाई माथि १३१–६८ को फराकिलो जीत निकालेको टाइम्स क्लबले सेमिफाइनलमा काठमाण्डौँकै विशाल मिलन केन्द्र विरुद्व १२३–१०१ को जीत निकाल्दै आर्मीसँगको फाइनल भेट पक्का गरेको हो ।
दुबै टिममा राष्ट्रिय खेलाडीको बाहुल्यता रहेकाले फाइनल भीडन्त रोमाञ्चक बनेको थियो ।
राष्ट्रिय खेलाडीहरूको दबदबा रहेको टाइम्स क्लबका ६ जना सदस्य राष्ट्रिय टिम सदस्य रहेका छन् । राष्ट्रिय बास्केटबल टिमका क्याप्टेन सदिश प्रधान, बिक्रम जोशी, बिजय बुर्जा, मोबिन्द्र क्षेत्री र मनिष केसी राष्टिय टिमबाट सदस्य हुन् । उनीहरू सबै टाइम्स क्लबबाट खेल्दै आएका छन् ।
गत वर्षको बिजेता समेत रहेको आर्मीमा आबद्ध आयुश सिंह, सौरभ श्रेष्ठ, रामकृष्ण घतानी, बिनोद महर्जन, आशिष बस्नेत, निश्चल महर्जन र अजय कुशवाह राष्ट्रिय टिमका सदस्य हुन् । चैत ५ गतेदेखि भएको प्रतियोगितामा देशभरका ८ वटा टिमको सहभागिता रहेको थियो ।
Discussion about this post