इटहरी : सुनसरीको धरान उपमहानगरपालिकामा सत्तारुढ सत्तारूढ गठबन्धनको बैठकले वडाहरूमा भागबण्डा टुंगो लगाएको छ ।
गठबन्धनले वडाहरूको उम्मेद्वारी कसले पाउने भन्ने विषयमा बिहीबार (आज) बिहान टुंगो लगाएका हुन् ।
सुनसरी क्षेत्र नं. १ का सभापति सुजेन्द्र तामाङका अनुसार धरानमा मेयरसहित नेपाली कांग्रेसले १३ वटा वडा, माओवादी केन्द्रले उपमेयरसहित ४ वटा वडा, जनता समाजवादी पार्टीले २ वटा वडा र नेकपा समाजवादीले १ वटा वडामा सहमति भएको हो ।
यहाँको १, २, ५, ६, ७, ८, ९, ११, १२, १३, १४, १६ र १८ नम्बर वडामा कांग्रेसले वडाध्यक्ष पाउने भएको उनले जानकारी दिए ।
‘गठबन्धनको बैठकले हामीले बसेर वडागत भागबण्डा गरेका छौँ,’ उनले टाकुरासँग भने, ‘गठबन्धनको निर्णय अनुसार नै हामी चुनावमा सहभागी हुनेछौँ, सबै ठाउँमा एकै छौँ ।’
उनका अनुसार नेकपा माओवादी केन्द्रले उपप्रमुखसहित ४ वटा वडामा उम्मेदवारी दिने सहमति भएको छ ।
जसअन्तर्गत ३, १५, १७ र २० नम्बरको वडाध्यक्षमा माओबादीले भाग पाएको छ । यता, जनता समाजवादी पार्टीले वडा १० र १९ पाउँदा नेकपा एकीकृत समाजवादी पार्टी (एस) ले वडा नम्बर ४ को वडाध्यक्ष पाउने सहमति भएको तामाङले बताए ।
‘हामी अब केहीबेरमा पत्रकार सम्मेलन गरेरै सार्वजनिक गर्ने तयारी गरिरहेका छौँ ।’ उनले भने ।
छलफलमा सङ्घीय लिम्बुवान राष्ट्रिय मञ्च सहभागी भएपनि उसले गठबन्धनलाई नैतिक समर्थन जनाउने बताइएको छ । यो सँगै राप्रपा र जनमोर्चाले समेत गठबन्धनलाई नैतिक समर्थन गर्ने बताइयो ।
आगामी बैशाख ३० गते हुने स्थानीय तहको निर्वाचनमा गठबन्धन गरेरै जाने सत्तारुढ दलहरूको निर्णय भएकाले धरानमा टुंगो लगाइएको हो ।
Discussion about this post