इटहरी (डेस्क) : पाँचथर र तेह्रथुममा भएका अलगअलग दुर्घटनामा परेर सुनसरीको रामधुनीका एक युवकसहित दुई जनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार मेची लोकमार्गअन्तर्गत पाँचथरको हिलिहाङ गाउँपालिका ७ सल्लेरीमा ट्याङ्कर र मोटरसाइकल ठोक्किएर दुर्घटना भएको छ ।
च्याङथापुबाट झापातर्फ आउँदै गरेको मे १ ख २४९४ नम्बरको ट्याङ्कर र झापाबाट ताप्लेजुङतर्फ जाँदै गरेको को ५ प २३३० नम्बरको मोटरसाइकल ठोक्किएर दुर्घटना भएको हो ।
दुर्घटनामा मोटरसाइकल चालक सुनसरीको रामधुनी ७ का २६ वर्षीय प्रेम घिसिङको मृत्यु भएको छ । दुर्घटनामा प्रेमसहित मोटरसाइकलको पछाडि सवार उनकी पत्नी (श्रीमती) २६ वर्षीया कञ्चन घिसिङ घाइते भएका थिए ।
दुवै जनालाई उपचारका लागि समर्पित अस्पताल पाँचथरमा लगिएको थियो । समान्य उपचारपछि थप उपचारका लागि झापाको बिर्तामोडस्थित बि एन्ड सी अस्पताल ल्याइएकोमा उपचारका क्रममा प्रेमको गएराति मृत्यु भएको प्रहरीले जनाएको छ ।
उनकी पत्नी कञ्चनको भने उपचार जारी छ । प्रहरीले ट्याङ्कर चालक झापाको सुरुङ्गा ७ का ३३ वर्षीय नीमा तामाङलाई नियन्त्रणमा लिएर घटनाको अनुसन्धान थालेको जनाएको छ ।
यस्तै, तेह्रथुमको म्याङ्लु्ङबाट बालुवा निकाल्न तमोर नदीतर्फ जाँदै गरेको प्रदेश १–०२–००३ त ४९८ नम्बरको ट्याक्टर म्याङ्लु्ङ नगरपालिका १ डबलीमा दुर्घटना भएको छ ।
कच्ची सडकखण्डमा ट्याक्टर आफैँ अनियन्त्रित भएर दुर्घटना हुँदा चालक फेदाप ५ इसिबुका अन्दाजी २६ वर्षीय रविन खापुङको घटनास्थलमै मृत्यु भएको पूर्व क्षेत्रीय ट्राफिक प्रहरी कार्यालय इटहरीले जानकारी दियो ।
प्रहरीको प्रारम्भिक अनुसन्धान अनुसार साँघुरो सडकबाट चिप्लिएर ट्याक्टर १ सय मिटरजति तल झरेको थियो । दुवै घटनाबारे प्रहरीले अनुसन्धान सुरु गरेको जनाएको छ ।
Discussion about this post