इटहरी (डेस्क) : इलाम र पाँचथरमा भएको सवारी दुर्घटनाबाट दुईजनाको मृत्यु भएको छ भने पाँचजना घाइते भएका छन् ।
प्रदेश १ प्रहरी कार्यालय विराटनगरमा अनुसार इलामको सूर्योदय नगरपालिका ७ सुकेपोखरीस्थित मेची राजमार्गमा झापाबाट फिक्कलतर्फ जाँदै गरेको प्रदेश नं. १–०१–००१ च ९१९३ नम्बरको स्कारपियो गाडी आफैँ अनियन्त्रित भइ सडकबाट अन्दाजी एकसय मिटर तल खसेर दुर्घटना भएको हो ।
दुर्घटनाबाट स्कारपियो गाडीमा सवार घाइते भएका ६ जना मध्ये झापाको बिर्तामोड नगरपालिका ३ बस्ने ५७ वर्षीय ईश्वरी प्रसाद खरेलको उपचारको क्रममा मृत्यु भएको प्रहरीले जनाएको छ ।
दुर्घटनामा गाडी चालक झापा बिर्तामोड नगरपालिका ५ बस्ने ५० वर्षीय गणेश पराजुली, बिर्तामोड ४ का ४५ वर्षीय एकराज बिष्ट, बिर्तामोड ४ का ४५ वर्षीय डिल्ली बस्नेत, बिर्तामोड ३ का ४७ वर्षीय तसबहादुर प्रधान र बिर्तामोड ४ का ५३ वर्षीय सन्तोष श्रेष्ठ घाइते भएका छन् ।
उनीहरूको उपचार भइरहेको प्रहरीले जनाएको छ ।
यस्तै, पाँचथर फालेलुङ ३ नाम्लोवास्थित भित्री कच्ची सडक खण्डमा पञ्चमुखीदेखि थोक्लेवुङतर्फ जाँदै गरेको प्रदेश नं. १–०२–००३ त १८५४ नम्बरको खाली ट्याक्टर आफैँ अनियन्त्रित भइ सडकदेखि अन्दाजी १० फिट तल झरेर दुर्घटना भएको हो ।
दुर्घटनामा ट्याक्टर चालक सोही स्थान बस्ने २२ वर्षीय को सुरेश साँवालाई ट्याक्टरले किचेर घटनास्थलमै मृत्यु भएको प्रहरीले जनाएको छ ।
दुवै घटनाबारे थप अनुसन्धान भइरहेको प्रहरीले जनाएको छ ।
Discussion about this post