विराटनगर : मोरङमा पेस्तोलसहित दुई युवकलाई प्रहरीले पक्राउ गरेको छ ।
भारतबाट बेच्न भनेर नेपाल ल्याइएका पेस्तोल र रिभल्बरसहित एक जनालाई सशस्त्र प्रहरी बल बोर्डर आउट पोष्ट (बीओपी) सिक्टी मोरङको टोलीले पक्राउ गरेको छ ।
हतियार किन्न खोज्ने अर्का एक व्यक्तिलाई पनि सशस्त्र प्रहरी टोलीले पक्राउ गरेको हो ।
पक्राउ पर्नेहरूमा मोरङको सुनवर्षी नगरपालिका ८ का २८ वर्षीय आरिफ आलम र उर्लाबारी नगरपालिका ६ बस्ने २९ वर्षीय नवीन धिमाल रहेका छन् ।
आलमलाई शंका लागेर चेकजाँच गर्ने क्रममा अटोमेटिक चाइनिज पेस्तोल र रिभल्बर सिक्सर एक–एक थान बरामद भएको हो । उनलाई नियन्त्रणमा लिएर बीओपीमा ल्याएर सोधपुछ गर्दा हतियार बेच्न नेपाल आएको खुलेको थियो ।
हतियार किन्न आएका धिमालले प्रयोग गरेको को २२ प ६७०७ नम्बरको मोटरसाइकल, ४७ हजार ७७० रुपैयाँ र दुई थान मोबाइल सेटसमेत बरामद गरेको प्रहरीले जनाएको छ ।
पक्राउ परेकाहरूमाथि थप अनुसन्धान भइरहेको प्रहरीले जनाएको छ ।
Discussion about this post