तरहरा : इटहरी २० तरहरामा तरहरा जेसीजले जेसीज सप्ताह कार्यक्रमको उद्घाटन गरेको छ ।
शनिबार (आज) ‘जेसीज रन’ कार्यक्रमको आयोजना गर्दै सप्ताह उद्घाटन गरिएको थियो ।
कार्यक्रम संयोजक सुरज लामाका अनुसार ‘जेसीज रन’ मा पुरुषतर्फ र महिलातर्फ गरी कूल एक सय ५१ जना सहभागी थिए ।
पुरुषतर्फ धरानका सरोज लिम्बूले २६ मिनेट ३२ सेकेन्डमा झण्डै १० किलोमिटर दूरी पार गर्दै प्रथम भए । यस्तै, संखुवासभाका नवीन गुरुङले २७ मिनेट ५७ सेकेन्डमा दूरी पार गर्दै द्वितीय र दमककै याङदेव राईले २८ मिनेटमा दूरी पार गर्दै तृतीय भएका थिए ।
महिलातर्फ धरानकी कल्पना राई, झापाको दमककी सपना राई र धरानकी जमुना लिम्बू क्रमशः प्रथम, द्वितीय र तृतीय भएका छन् ।
पुरुष र महिला दुवैतर्फ उत्कृष्ट तीनलाई क्रमशः सात हजार, पाँच हजार र तीन हजारसहित मेडल र प्रमाणपत्र वितरण गरिएको तरहरा जेसीजका अध्यक्ष उमेश राईले बताए ।
यस्तै, अण्डर १३ मा धरानकै महसुस राई विजयी भएका थिए । भेट्रानतर्फ धरानकै मंगल तामाङ, धरानकै समीर चौधरी र धरानकै रामप्रसाद उराउ क्रमशः प्रथम, द्वितीय र तृतीय भए ।
उनीहरूलाई मायाको चिनो वितरण गरिएको थियो । यस्तै फरक क्षमता भएका इटहरी २० तरहराका विशाल राईलाई सम्मान समेत गरिएको थियो ।
कार्यक्रममा अल्ट्रा म्याराथन च्याम्पियन मीरा राई प्रमुख अतिथि थिइन् । सन् २०१५ मा फ्रान्समा सम्पन्न ८० किलोमिटरको विश्व म्याराथनमा पूर्व विजेतालाई पन्छाउँदै पहिलो भएकी मीराले खेल क्षेत्रले शारीरिक स्वस्थ सँगै सबल बनाउने तर्क गरिन् ।
उक्त कार्यक्रममा इटहरी, धरान, विराटनगर, दमक, धनकुटा लगायतबाट धावक सहभागी थिए ।
Discussion about this post