इटहरी : इटहरीकी एक महिला सप्तकोसीमा हाम्फाल्न लाग्दा प्रहरीले उद्वार गरेको छ ।
जिल्ला प्रहरी कार्यालय सुनसरीका प्रमुख एसपी प्रभुप्रसाद ढकालका अनुसार आज (मंगलबार) दिउँसो ३ः१० बजेको समयमा कोसी गाउँपालिका ८ स्थित सप्तकोसी नदीको पुलबाट (ढोका नं. १) हाम्फाल्न लाग्दा प्रहरीले उद्वार गरेको हो ।
इटहरी घर भएपनि हाल इटहरी १६ स्थित रामजानकी शान्ति वृद्वा आश्रममा बस्ने ७० वर्षीय महिलाको सप्तकोसीमा हाम्फाल्न लाग्दा तत्काल उद्वार गरिएको एसपी ढकालले जानकारी दिए ।
हाम्फाल्न लाग्दा स्थानीय मानिसहरूले प्रहरी चौकी कोसीब्यारेजलाई जानकारी गराएका थिए ।
प्रहरी टोलीले उनको सकुसल उद्वार गरी सोधपुछ गर्दा परिवारमा कोही नभएको र वृद्वाश्रममा बस्दा मानसिक तनाव भएका कारण हाम्फाल्न लागेको खुलेको छ । उनलाई प्रहरीले उद्वार गरी सम्झाईबुझाई गरेको एसपी ढकालले बताए ।
पछिल्लो समय सप्तकोशी नदीमा हाम्फालेर आत्महत्या गर्न खोज्ने व्यक्तिहरूको संख्या बढेकोले उनीहरूको उद्वारको लागि प्रहरीले थप निगरानी बढाएको जनाएको छ ।
Discussion about this post