धरान : धरानमा निर्माणाधीन प्रदेश वन निर्देशनालयको भवन अवैध रहेको भन्दै भत्काउनका लागि धरान उपमहानगरले सूचना टाँसेको छ ।
धरान उपमहानगरपालिका १५ तीनकुनेमा नक्सा पास नगरी र स्वीकृती नलिई भवन निर्माण गरेको भन्दै मेयर हर्कराज राई (हर्क सम्पाङ) ले निर्माण रोक्ने आग्रहसतिको सूचना टाँसेको हो ।
उपमहानगरले धरानमा निर्माण हुने भौतिक संरचनाबारे उपमहानगरलाई जानकारी हुनुपर्नेमा निर्देशनालयले नक्सा पास नै नगरी भौतिक संरचना निर्माण गरेको भन्दै चेतावनी दिएको हो ।
‘धरान उपमहानगरपालिकाको क्षेत्रभित्र भौतिक संरचना निर्माण गर्दा धरान उपमहानगरपालिकाको अनिवार्य निर्माण स्वीकृति लिनु पर्ने र नक्सा पास गराएर मात्रै निर्माण गर्नु पर्ने नियम रहेको हुँदा सो नियम अन्तर्गतको कुनै पनि प्रक्रिया पूरा नगरी नियम मिचेर बनाएको देखिएकाले निर्माण कार्य तुरुन्त रोकी प्रक्रियामा आउनु होला, अन्यथा अवैध संरचना हटाउनु पर्ने नियमानुसार कारबाही अघि बढाइने ब्यहोरा जानकारी गराइन्छ ।’ सूचनामा भनिएको छ ।
प्रदेश वन निर्देशनालयका चारवटा भवनको निर्माण अन्तिम चरणमा पुगेको छ । भवन निर्माण सकेर सर्ने तयारीमा रहेपनि नक्सा पास नभएको उपमहानगरले जनाएको छ ।
केहीदिनअघि धरान २० को विष्णुपादुकामा उपमहानगरपालिकाले माया धराने साबुन उद्योग खोल्न लागेको थियो ।
जनश्रमदानबाट काम भईरहेपनि सब डिभिजन वन कार्यालयले वन भित्र उद्योग खोल्न पाउने भन्दै उच्च अदालत विराटनगरमा उपमहानगर विरुद मुद्दा हालेको थियो । उच्च अदालतले पनि साबुन उद्योगको काम रोक्न अन्तरिम आदेश दिएको छ ।
त्यससँगै मेयर साम्पाङ रुष्ठ बनेका छन् । सोही कारणले गर्दापनि भवन भत्काउने चेतावनीसहित सोमबार मेयर साम्पाङले सूचना टाँस गरिएको बताइएको छ ।
Discussion about this post