इटहरी : इटहरीमा प्रहरीले दुई छुट्टाछुट्टै स्थानबाट २१ ग्रामभन्दा बढी ब्राउनसुगरसहित तीन जनालाई पक्राउ गरेको छ।
कोशी प्रदेश प्रहरी कार्यालय विराटनगर र इलाका प्रहरी कार्यालय इटहरीबाट खटिएको संयुक्त टोलीले मंगलबार इटहरी–८ गैसारबाट १०.५७ ग्राम ब्राउनसुगरसहित दुई जनालाई पक्राउ गरेको हो।
पक्राउ पर्नेमा भारतको फारबिसगन्ज घर भई इटहरी–८ बस्दै आएका ३२ वर्षीय अवधेश सिंह र इटहरी–३ का २९ वर्षीय सरोज काफ्ले रहेका छन्।
प्रहरीका अनुसार इटहरी–८ गैसारमा लागूऔषध बिक्री–वितरण भइरहेको सूचनाका आधारमा रफिक रायको घरमा डेरा गरी बस्ने सिंह र काफ्लेमाथि खानतलासी गर्दा उनीहरूको साथबाट उक्त पदार्थ बरामद भएको हो।
यस्तै, सोही दिन करिब आधा घण्टापछि इटहरी–१७ लविपुरबाट प्रहरीले थप एक युवतीलाई पक्राउ गरेको छ।
लागूऔषध बिक्री–वितरण भइरहेको सूचनाका आधारमा खटिएको प्रहरी टोलीले इटहरी–२ की २९ वर्षीया भवना गुरुङलाई नियन्त्रणमा लिएको हो।
प्रहरीले उनलाई रामधुनी नगरपालिका–१ झुम्कास्थित साई हस्पिटलमा चिकित्सकीय जाँच गराउँदा गोप्य अंगभित्र लुकाइराखेको अवस्थामा १०.७० ग्राम ब्राउनसुगर फेला परेको जनाएको छ।
दुवै घटनामा बरामद लागूऔषधसहित पक्राउ परेका तीनै जनालाई सम्बन्धित प्रहरी कार्यालयमा राखेर थप अनुसन्धान भइरहेको प्रहरीले जनाएको छ।
Discussion about this post