विराटनगर : विराटनगर विमानस्थलको नयाँ टर्मिनल भवन निर्माण हुने भएको छ ।
करिब २ अर्ब ४२ करोड लागतमा १६ हजार २७७ वर्ग मिटरको टर्मिनल भवन निर्माण गर्न लागिएको हो । सोमबार (आज) टर्मिनल भवनको संस्कृति, पर्यटन तथा नागरिक उड्डयन मन्त्री सुदन किँरातीले शिलान्यास गरेका हुन् ।
नागरिक उड्डयन प्राधिकरणका महानिर्देशक प्रदीप अधिकारीका अनुसार निर्माण हुन लागेको टर्मिनल भवन आन्तरिक तर्फ देशकै ठूलो हो ।
पोखरा अन्तर्राष्ट्रिय विमानस्थलको टर्मिनल भवन १५ हजार वर्ग मिटरको र गौतमबुद्ध विमानस्थलको टर्मिनल भवन पनि १४ हजार वर्ग मिटरको रहेको अधिकारीको भनाइ छ ।
विमानस्थलको धावन मार्ग विस्तारका लागि यसअघि जग्गा अधिग्रहण गर्ने प्रक्रिया सुरु भएको थियो । तर, बजेट अभावमा अधिग्रहण गर्ने भनिएको जग्गाको रोक्का फुकुवा भयो ।
विमानस्थल विस्तारको योजना तत्काल अघि नबढेपनि टर्मिनल भवन भने निर्माण गर्न लागिएको हो । तीन वर्षभित्र टर्मिनल भवन निर्माण सकिने बताइएको छ ।
Discussion about this post