इटहरी : सुनसरीमा ११ वर्षीय बालकको अपहरण भएको छ ।
जिल्ला प्रहरी कार्यालय सुनसरीले वैशाख १७ गते अपहरणमा परेका भोक्राहा नरसिंहका विन्देश्वर यादवका ११ वर्षीय छोरालाई विहारको समस्तीपुर एकडेरा एरियाबाट सकुशल उद्वार गरेको जनाएको छ ।
भारतीय नम्बरको बीआर ०९ आर ०७९६ लेखिएको गाडीमा आएका अपरिचित ५ भारतीय नागरिकले अपहरण गरेको भोलिपल्ट १८ गते ह्वाटसएपको भारतीय नम्बरबाट फोन गरेर २५ लाख फिरौती मागेका थिए ।
फिरौती मागेपछि छोरा अपहरणमा परेको थाहा पाएर यादवले प्रहरीलाई जानकारी दिएलगत्तै सादा पोसाकमा एक प्रहरी निरीक्षकसहितको टोली, प्रदेश प्रहरी अनुसन्धान समूहको संयुक्त टोलीले खोजतलास गर्दा गत १९ गते समस्तीपुरबाट सकुशल उद्वार गरिएको सुनसरी जिल्ला प्रहरी कार्यालयका प्रवक्ता प्रहरी नायब उपरिक्षक राजकुमार राईले जानकारी दिए ।
प्रहरीका अनुसार बालकलाई अभिभावकको जिम्मा लगाइएको छ । घटनाबारे थप अनुसन्धान र निगरानी बढाइएको प्रहरीले जनाएको छ ।
Discussion about this post