इटहरी : इटहरी क्षेत्रका सरकारी (सामुदायिक) विद्यालयहरूमा अध्ययनरत छात्रछात्राहरूलाई आज (आइतबार) देखि मेन्युसहितको दिवा खाजा कार्यक्रम सुरु भएको छ ।
इटहरी उपमहानगरपालिकाले टेण्डरमार्फत मासुसहितको मेन्युको खाजा खुवाउन सुरु गरेको हो । उपमहानगरपालिकाले विद्यार्थीलाई पोषिलो खानेकुरा खुवाउन सुरु गरेसँगै आइतबार यसको शुभारम्भ गरिएको छ ।
जंक फुड नखुवाउन उपमहानगरले पहिलोपटक दिवा खाजाको टेण्डर जारी गरेर खाजाको सुरुवात गरेको इटहरीका नगर प्रमुख हेमकर्ण पौडेलले बताए । शिक्षा क्षेत्रको सुधारको लागि विद्यालयहरूमा दिवा खाजा कार्यक्रम सुरु गरेको उनको भनाइ छ । नेपालमै पहिलोपटक मेन्युसहित यो किसिमको खाजाको सुरुआत गरिएको उनको दाबी छ ।
‘यो कार्यक्रम लागू गर्न चुनौतीपूर्ण थियो । पोषणयुक्त खाना खुवाउने उदेश्यले यो किसिमको कार्यक्रम योजना लागू गरेका हौँ,’ उनले भने, ‘सामुदायिक विद्यालयको शिक्षाको गुणस्तर वृद्वि गर्नका निम्ति उपमहानगरले पहल गरिरहेको छ ।’ यस वर्ष इटहरी उपमहानगरले शिक्षा र स्वास्थ्यमा सबैभन्दा बढी बजेट बिनियोजन गरेको उनले बताए ।
इटहरी क्षेत्रभित्रका सामुदायिक विद्यालयहरूमा अध्ययनरत विद्यार्थीहरूलाई उपमहानगरपालिकाले तीन करोड भन्दा बढी दिवा खाजाका लागि बजेट छुट्याएको जनाएको छ ।
प्राथमिक कक्षादेखि कक्षा ६ सम्मका विद्यार्थीहरूलाई विद्यालयमै खाजा पकाएर खुवाउनुपर्ने नियम बनाइएको छ ।
इटहरी वडा नं. १ मा सञ्चालित राष्ट्रिय माध्यमिक विद्यालयबाट कक्षा ६ का विद्यार्थीलाई खाजा खुवाएर यो कार्यक्रमको सुरुआत गरिएको हो ।
सामुदायिक विद्यालयहरूमा अध्ययनरत बालबालिकाहरूलाई विद्यालयमा टिकाउन र गुणस्तर वृद्धि गर्न सङ्घीय सरकारले बालदेखि पाँच कक्षासम्मका लागि दिवा खाजाको रकम १५ रुपैयाँको दरले दिँदै आएको थियो ।
दिवा खाजा कार्यक्रमका लागि संघीय सरकारले चालु आर्थिक वर्षका लािग इटहरी क्षेत्रभित्रका सामूदायिक विद्यालयका विद्यार्थीका लागि एक करोड ९८ लाख ८४ हजार रुपैयाँ अनुदान उपलब्ध गराएको छ । तर, यो बजेट पर्याप्त नहुने भन्दै उपमहानगरपालिकाले थप तीन करोड ६६ लाख १६ हजार रुपैयाँ थप गरी कुल पाँच करोड ६५ लाख रुपैयाँमा टेण्डरमार्फत ठेक्का लगाएर प्रभावकारी बनाउन थालेको हो ।
‘हाम्रो खाजा खोसिएको थियो, फेरि इटहरी उपमहानगरपालिकाबाट दिन थालिएको छ,’ राष्ट्रिय माध्यमिक विद्यालय कक्षा ६ मा अध्ययनरत प्रद्युम्न दाहालले भने, ‘यो दिवा खाजा कार्यक्रमले हामी सवै विद्यार्थीमा एकरुपता ल्याएको छ ।’
इटहरीका सामुदायिक विद्यालयमा खाजा पकाउने व्यवस्था भइसकेको र केहीमा बाँकी रहेपनि चाँडै पूरा हुने हुँदा व्यवस्थापन पक्ष मजबुद बनाएर काम गर्ने खाजा व्यवस्थापनका जिम्मा लिएको एरिना टिफिनका समीर कार्कीले बताए ।
यता, राष्ट्रिय माध्यमिक विद्यालयका प्रधानाध्यपाक सरनकुमार बस्नेतले उपमहानगरपालिकाले थालेको दिवा खाजा कार्यक्रमले दिवा खाजामा एकरुपता ल्याएको बताए ।
यस्तो छ उपमहानगरको मेन्यु
आइतबार प्रति विद्यार्थी दुई सय १० ग्रामको तीन किसिमका फलफूल खुवाउन थालिएको छ । सोमबार विद्यार्थीहरूलाई भुटेको अण्डा र चिउरा, मङ्गलबार मिक्स गेडागुडीसँगै चिउरा खुवाउन सम्झौता भएको छ ।
यस्तै, बुधबार खीर र तरकारी खुवाउनु पर्ने हुन्छ । बिहीबार दही, चिउरा र तरकारी खुवाउनुपर्ने बताइएको छ ।
शुक्रबार खसी वा कुखुराको मासु र चिउरा खुवाउनु पर्नेछ । । शाकाहारीका लागि भने मटर–पनिर र चिउरा खुवाउन पर्ने उपमहानगरले मेन्यु बनाएको छ ।
Discussion about this post