इटहरी : कोसी प्रदेशको प्रदेशसभा सचिवालयले सभामुख चयनको प्रक्रिया अगाडि बढाउने तयारी थालेको छ ।
तत्कालीन सभामुख बाबुराम गौतमले राजीनामा दिएपछि चार महिनादेखि रिक्त रहेको सभामुख चयनको प्रक्रिया अगाडि बढाउने तयारी थालिएको हो । गौतमले गत साउन १६ गते सभामुखबाट राजीनामा दिएका थिए ।
उपसभामुख सिर्जना दनुवारले सभामुख चयनका लागि प्रदेशसभामा प्रतिनिधित्व गर्ने दलका नेताहरूसँग छलफल सुरु गरिएको बताइन् । अब प्रदेशसभाको अर्को बैठक बुधबार बस्दैछ ।
उपसभामुख दनुवारले बुधबारको प्रदेशसभाको बैठकमा सभामुख चयनको प्रक्रिया अघि बढाउने तयारीमा रहेको र त्यसैका लागि दलहरूसँग छलफल गरिरहेको बताइन् ।
९३ सदस्यीय प्रदेशसभामा एमालेको उपसभामुखसहित ४०, कांग्रेसका २९, माओवादी केन्द्रका १३, राप्रपाका ६, नेकपा (एकिकृत समाजवादी)का ४ र जनता समाजवादी पार्टीका एक जना सांसद छन् ।
कोसीमा राप्रापलाई सभामुख दिने तयारी भइरहेको गठबन्धन दलका नेताहरूले बताएका छन् ।
Discussion about this post