शनिबार तरहरामा १० किमि दौड प्रतियोगिता, एक हजार सात सय धावक सहभागी हुने

तरहरा : इटहरी २० तरहरामा १० किलोमिटर दौड प्रतियोगिताको तयारी पूरा भएको छ । आयोजक तरहरा रनले बिहीबार पत्रकार सम्मेलन गरी दौड प्रतियोगिताको तयारी पूरा भएको जानकारी दिएको हो ।

तरहरा रनका अध्यक्ष शिवु रुम्दाली राईले विभिन्न सात विधामा हुने प्रतियोगितामा हालसम्म एक हजार सात सय जनाले आवेदन दिएका छन् ।

आवेदकहरूले शनिबार (फागुन २६) गते तरहरा चौकमा भेला भएर दौड प्रतियोगितामा सहभागी जनाउन सक्ने उनले बताए ।

उनकाअनुसार १२ वर्षभन्दा कम उमेरका बालबालिकाहरूलाई ३ किलोमिटर दूरीको दौडमा सहभागी गराइनेछ । यस्तै, १५ वर्षभन्दा कम उमेरका बालबालिकाहरूलाई १० किलोमिटर दूरीको दौडमा सहभागी गराइनेछ । यसैगरी, १६ देखि ३९ वर्षसम्म र ४० देखि माथिका (भेट्रान) लाई १० किलोमिटर दौडमा सहभागी गराइनेछ ।

ह्वील चियरमार्फत पनि एक किलोमिटर दौड प्रतियोगिता गराइनेछ । यस्तै, स–परिवार दौड प्रतियोगिता ३ किलोमिटरको रहनेछ । सबै विधाका गरी कूल एक हजार सात सय धावक सहभागी हुने आयोजकको दाबी छ ।

अध्यक्ष राईका अनुसार खुल्ला दौड प्रतियोगिताका विजेताले (पुरुष महिला दुवै) नगद ३० हजार, उपविजेतालाई नगद २० हजार र तृतीय हुनेलाई नगद १० हजारसहित मेडल प्रदान गरिनेछ ।

यसैगरी १६ वर्षभन्दा कम उमेरका धावकमध्ये विजेतालाई नगद १० हजार, उपविजेतलाई सात हजार र तृतीयलाई पाँच हजार प्रदान गरिनेछ । यस्तै, १२ वर्षभन्दा कम उमेरका धावकमध्ये विजेता, उपविजेता र तृतीयलाई क्रमशः नगद पाँच हजार, तीन हजार र दुईहजारसहित मेडल वितरण गरिनेछ ।

सबै विधाका प्रतियोगितामा पुरुष र महिला दुवैलाई पुरस्कृत गरिने आयोजकले जनाएको छ । खेल क्षेत्रलाई चलायमान बनाउनका निम्ति र स्वास्थ्यलाई स्फूर्त राख्नका निम्ति उक्त दौड प्रतियोगिता आयोजना गरिएको राईले बताए ।

खेलका मूल संयोजक मीनकुमार खवासका अनुसार प्रतियोगितामा कूल २५ लाख रुपैयाँ खर्चको अनुमान गरिएको छ ।

उनले भने, ‘हामीले मुख्य बजार क्षेत्रमा भन्दापनि ग्रामीण क्षेत्रमा रनको आयोजना गर्नेछौँ । जसकारण गाउँठाउँको वास्तविक चित्र बुझिनेछ ।’

उनका अनुसार तरहरा चौकदेखि भित्री सडकखण्डमा दौड प्रतियोगिता आयोजना हुनेछ । दौड प्रतियोगितामा ट्राफिक व्यवस्थापनका लागि पनि तयारी पूरा भएको र प्रतियोगिताका लागि एक सय ७० जना स्वयम्सेवक खटिने उनले बताए ।

साथै, दौड अवधिभर आकस्मिक परेको अवस्थामा दुईवटा एम्बुलेन्स तयारीमा रहेको र पाँचजना नर्सले तत्काल प्राथमिक उपचार गर्नसक्ने खवासले बताए ।