इटहरी : इटहरीमा मध्यरातिदेखि श्वास रोकिनेगरी धुँवा फैलिएर वातावरण प्रदूषित बनेको छ । वातावरण प्रदूषित बन्दा श्वास फेर्नै गाह्रो हुने र आँखासमेत समस्या भइरहेको स्थानीयबासीको भनाइ छ ।
इटहरी २ का रोशन अधिकारीले इटहरी–धरान सडकखण्डमा रहेको चारकोसे झाडीमा मध्यरातिदेखि डढेलो लागेका कारण त्यहीँबाट फैलिएको धुवाँले समग्र इटहरी क्षेत्रसहित रामधुनीको केही भागमासमेत समस्या भइरहेको बताए ।
‘चारकोसे क्षेत्रमा रातिदेखि नै डढेलो लागेको भन्ने कुरा आएको छ,’ उनले भने, ‘चारकोसेको बीच भागतिर डढेलो लाग्दा सबै क्षेत्रमा समस्या भएको छ । श्वास फेर्न, आँखा हेर्न मात्रै होइन । बाटोमा आवतजावत गर्ने यात्रुहरूलाईसमेत समस्या भइरहेको छ ।’
उनले तत्काल आगो निभाउनका निम्ति नियामक निकायले चासो दिनुपर्ने बताए ।
‘आगो कहाँदेखि कहाँसम्म लागेको भन्ने पनि थाहा भएन,’ अधिकारीले भने, ‘यसबारे वन कार्यालय र स्थानीय सरकारले तत्काल चासो देखाएर आगो निभाउनुपर्छ ।’
यस क्षेत्रमा धरान हुँदै पहाडी जिल्ला जाने सयौँ यात्रुहरू आवतजावत गर्छन् । तर, जताततै धुवाँ फैलिएका कारण बाटो हिँड्ने यात्रुहरूलाईसमेत समस्या भइरहेको छ ।
इटहरी उपमहानगरपालिकाका वातावरण अधिकृत पुष्पनारायण चौधरीले यसबारे आफूले बुझ्ने र डढेलो लागेको भए वन कार्यालयसँग समन्वय गर्ने बताए ।
बराहक्षेत्रको जंगल क्षेत्रमा डढेलो लागेको र त्यसबाट धुवाँ फैलिएको उनले बताए । ‘बराहक्षेत्रको जंगलमा आगो लागेको र निभाएका कारण धुवाँ फैलिएको कुरा आएको छ,’ उनले भने ।
उनले इटहरी क्षेत्र सेउती छेउ नजिकै पनि डढेलो लागे, नलागेकोबारे बुझ्ने काम भइरहेको बताए ।
‘धरान उपमहानगरले सेउतीदेखि पूर्वदेखि साइटमा आगो लगाउने र त्यसबाट धुवाँ आउने केही दिनअघि मात्रै गुनासो आएको थियो,’ उनले टाकुरा न्यूजसँग भने, ‘मैले धरानको वातावरण शाखासँग कुरा गर्दा जंगलमा लागेको आगो पुर्ने कार्य गर्ने भन्ने कुरा भएको छ ।’
उनले अहिले पनि धरान उपमहानगर र वन कार्यालयसँग समन्वय गर्ने बताए । आवश्यक परेको अवस्थामा दमकलबाट पानी लगाएर आगो निभाउने उनको भनाइ छ ।
खासगरी घाँस नपलाउँदा घाँसका लागि डढेलो लगाउने गर्दासमेत डढेलो लाग्ने जानकारहरू बताउँछन् कतिपयले आफैँ जानाजान आगो लगाउने, कतिपयले धुम्रपान सेवन गरेर जंगलमा फाल्दासमेत आगलागी र डढेलो लाग्ने बताइन्छ ।
जंगलमा लागेको डढेलो निभाउदा केही हदसम्म सहज हुने इटहरीबासीको भनाइ छ ।
यसबारे कोशी प्रदेश प्रहरी कार्यालय विराटनगरका प्रवक्ता, प्रहरी उपरीक्षक (एसपी) सुमन तिम्सिनाले जंगल क्षेत्रमा डढेलो लगाउने कार्य गर्ने मानिसको पहिचान गरी कारबाहीको दायरामा ल्याउने बताए ।
‘आगोजन्य पदार्थका कारण मानवीय क्षति हुँदै आइरहेको घटना बाहिरिएपनि मानिसहरू सचेत बनेको पाइँदैन,’ तिम्सिनाले भने, ‘जंगलमा डढेलो लगाएर अपराध गर्नेहरूलाई कारबाहीको दायरामा ल्याउनेसम्मको प्रहरी टोलीको गस्ती परिचालन गरिएको छ ।’
उनले कोशी प्रदेश प्रहरी कार्यालय विराटनगर, तालिम केन्द्र र जिल्ला प्रहरी कार्यालयबाट प्रदेशका १४ वटै जिल्लामा प्रहरी टोली खटिइरहेकोसमेत बताए ।
‘डढेलो लागेको क्षेत्र विकट हुन्छ । प्रहरीकै पहुँचभन्दा बाहिरका एरियामा चरम लापरबाही भएको गुनासोहरू आइरहेका छन्,’ उनले भने ।
Discussion about this post