विराटनगर : विद्यालय र शैक्षिक संस्था छेउछाउमा भइरहेको सुर्तीजन्य पदार्थको बिक्री वितरणमा कडाइका साथ रोक लगाउनुपर्नेमा सरोकारवालाहरुले माग राखेका छन् ।
विश्व सुर्तीजन्य पदार्थरहित दिवसका अवसरमा सुर्तीजन्य तथा मद्यपान सेवनको निषेध, न्यूनीकरण, नियन्त्रण र नियमनसम्बन्धी सरोकारवालाहरूको अन्तरक्रियामा बोल्ने वक्ताहरूले विशेषगरी विद्यालय क्षेत्रलाई सुर्तीजन्य पदार्थको बिक्री वितरण र सेवनमै रोक लगाउनुपर्नेमा जोड दिएका हुन् ।
‘सुर्ती उद्योगको प्रभावबाट बालबालिकालाई बचाऔं’ भन्ने सन्देशका साथ यसपटक मे ३१ मा विश्व सुर्तीजन्य पदार्थरहित दिवस मनाइएको छ । सोही दिवसको सन्दर्भ पारेर विराटनगर महानगरपालिका र स्वास्थ्य कार्यालय मोरङले पत्रकार सम्मेलनसहितको सरोकारवालासित बुधबार अन्तरक्रिया आयोजना गरेको हो ।
अन्तरक्रियामा पोखरिया माविका प्राचार्य खेमराज भट्टराईले विद्यालयबाट एक सय मिटर वरिपरि सुर्तीजन्य पदार्थको बिक्री वितरण र सेवन गर्न नपाइने ऐनमै व्यवस्था भए पनि बिक्री भइरहेको बताए ।
उनले कडाइका साथ ऐन कार्यान्वयन गर्नुपर्नेमा जोड दिए । पत्रकार कुमोद अधिकारी र सुशीला पाठकले चिया पसलमा विद्यार्थी उमेरका युवायुवतीले खुलेआम सुर्तीजन्य पदार्थ सेवन गर्ने गरेकाले महानगरको अनुगमन त्यतातिर पनि केन्द्रित हुनु जरुरी रहेको विचार राखेका थिए ।
सुर्तीजन्य पदार्थसम्बन्धी विद्यमान ऐन, कानुन र कार्यान्वयन अवस्थाका विषयमा डब्लूएचओका प्रतिनिधि डा. संगीता राई र कृष्णकुमार देवले कार्यपत्र प्रस्तुत गरेका थिए ।
प्रमुख प्रशासकीय अधिकृत राजेन्द्र पराजुलीले बालबालिकालाई सुर्तीजन्य सेवनबाट बचाउन अभिभावक पनि सचेत हुनुपर्नेमा जोड दिए ।
नेपालमा हरेक वर्ष ३९ हजार मानिसको मृत्यु सुर्तीजन्य पदार्थको सेवनका कारण हुने गरेको तथ्यांकमा उल्लेख छ । विश्वमा हरेक वर्ष सुर्तीजन्य पदार्थको सेवनका कारण ८० लाख मानिसको मृत्यु हुने गरेको जनाइएको छ ।
Discussion about this post