नाबालिका दिदी–बहिनीको शव फेला प्रकरण : आमाले हत्या गरेको स्वीकार गरिन्, प्रहरीद्धारा सार्वजनिक

मोरङ : मोरङको सुन्दरहरैँचा नगरपालिका–७ स्थित केरा बगानभित्र मृत भेटिएका नाबालिकाको हत्यामा संलग्न आमालाई प्रहरीले पक्राउ गरी सार्वजनिक गरेको छ ।

गत शनिबारसुन्दरहरैँचास्थित केरा बगानभित्र दिदी–बहिनीको शव फेला परेको थियो । धनकुटाको पाख्रीबास नगरपालिका–४ डिकुरे घर भइ सुन्दरहरैँचा–७ मा बस्दै आएका अर्जुन कार्कीका नाबालिका छोरीहरू १ वर्षीया आइका र ३ वर्षीया अर्पणा कार्की शनिबार दिउँसो ४ः३० बजेतिर मृत फेला परेका थिए ।

सो घटनामा मृतक नाबालिकाकी आमा २९ वर्षीया अस्मिता पौडेललाई प्रहरीले बुधबार पक्राउ गरी सार्वजनिक गरेको हो । कोशी प्रदेश प्रहरी कार्यालय विराटनगरका प्रवक्ता, प्रहरी वरिष्ठ उपरीक्षक (एसएसपी) भीमबहादुर दाहालले घटनामा संलग्नता देखिएपछि पक्राउ गरी सार्वजनिक गरिएको जानकारी दिए ।

‘श्रीमानसँगको विवाद भएर घरबाट बाहिर निस्किएको देखिन्छ । हामीले आज जिल्ला अदालत मोरङबाट चार दिनको म्याद थप गरी अनुसन्धान अगाडि बढाएका छौँ,’ एसएसपी दाहालले भने, ‘बच्चा मृत फेला परिवार पनि विक्षिप्त छन् । तर, अनुसन्धान भने अगाडि बढाएका छौँ ।’

उनका अनुसार पक्राउ परेकी अस्मिताले पनि विष सेवन गरेको खुलेको छ । ती महिलाको अहिले विराटनगरस्थित कोसी अस्पताल विराटनगरमा प्रहरीको निगरानीमा उपचार भइरहेको छ ।

‘घटना भएकै स्थान आसपास रहेको आशंकामा खोजी व्यापक बनाएका थियौँ, कोशी प्रदेशका सबै प्रहरी कार्यालयमा उनको फोटो पठाएर खोजी गरेका थियौँ, दाहाल भन्छन्, ‘घटनास्थलमै मोबाइल पनि छाडेर गएका कारण घटनामा संलग्नलाई पक्राउ गर्न केही दिन ढिलाइ भएको हो ।’

उनले पक्राउ परेकी अस्मितामाथि थप अनुसन्धान भइरहेको छ । घटना भइसकेपछि उनलाई केही म्यासेजहरूसमेत पठाएको प्रारम्भिक अनुसन्धानबाट खुलेको प्रहरीको भनाइ छ ।

‘केही एसएमएसहरू पनि पठाएको देखिएपछि अनुसन्धान नजिक पुगेका छौँ,’ उनले भने, ‘भर्खर त अनुसन्धान सुरु गर्दैछौँ । अब अनुसन्धानले के देखाउँछ भन्नेबारे खुल्न बाँकी छ ।’ विष खुवाएर हत्या गरिसकेपछि अस्मिताले अर्जुनलाई ‘तेरा छोरी मारिदिइसकें, म पनि मर्छु’ भनेर मोबाइलमा म्यासेज पठाएको उनले बताए ।

जिल्ला प्रहरी कार्यालय मोरङका प्रमुख, एसपी नवराज कार्कीकाअनुसार मृतक दुवै नाबालिकाको धरानस्थित बीपी कोइराला स्वास्थ्य विज्ञान प्रतिष्ठानमा पोस्टमार्टमपछि दुवै शवको अन्त्येष्टि गरिसकिएको छ ।

केरा बगानभित्र दिदीले बहिनीलाई अंगालो हालेको अवस्थामा शव फेला परेको थियो । नाबालिकाहरूको शव भेटिएको स्थानमा कीटनाशक औषधि ‘मेटासिट’को बट्टा फेला परेको थियो । त्यही ‘मेटासिट’ खुवाएर हत्या गरेको प्रहरीको प्रारम्भिक अनुसन्धानबाट खुलेको एसपी कार्कीले जानकारी दिए ।

उनीविरुद्ध कर्तव्य ज्यान मुद्दामा अनुसन्धान सुरु गरिएको कार्कीले बताए । ‘बिर्तामोडस्थित सडकमा अस्वस्थ अवस्थामा फेला पारिएको हो । शारीरिक अवस्था निक्कै कमजोर भएपछि उपचारका लागि अस्पताल भर्ना गरिएको छ,’ एसपी कार्कीले भने ।

प्रहरीमा ती महिलाले आफूले छोरीहरूलाई विष खुवाएपछि आफैँ पनि विष सेवन गरेको बयान दिएकी छन् । ‘मलाई पतिले धेरै तनाव दिन्थे ।

‘टर्चर’ सहन सकिन,’ उनले बयानमा भनेकी छन्, ‘त्यसपछि दुवै छोरीलाई लिएर हिँडे । मर्नलाई भनेर विष पनि लिएर गएकी थिएँ । छोरीहरूलाई मात्रै छाडेर एक्लै मर्न मन लागेन ।’

यो पनि – सुन्दरहरैँचामा नाबालिका दिदी–बहिनीको शव फेला प्रकरण : आमा पक्राउ

यो पनि – सुन्दरहरैँचामा नाबालिका दिदीबहिनीको शव अँगालो मारेको अवस्थामा भेटियो, घटना शंकास्पद