इटहरी : कोशी प्रदेश सरकारमा दुई मन्त्रालयको जिम्मेवारी सम्हालिरहेका भूपेन्द्र राईलाई प्रवक्ताको जिम्मेवारी पनि दिइएको छ ।
भौतिक पूर्वाधार तथा विकास र स्वास्थ्य मन्त्रीकोसमेत जिम्मेवारी सम्हालिरहेका राईलाई प्रवक्ताको जिम्मेवारी दिइएको हो । बुधबार बसेको कोशी प्रदेशको मन्त्रिपरिषदको बैठकले मन्त्री राईलाई प्रवक्ताको जिम्मेवारी दिएको हो ।
यसअघि कोशी प्रदेशका प्रवक्तासमेत रहेका आन्तरिक मामिला तथा कानुनमन्त्री लीलाबल्लभ अधिकारीले पदबाट राजीनामा दिएपछि राईलाई प्रवक्ताको जिम्मेवारी दिइएको हो ।
प्रवक्ताको जिम्मेवारी पाएपछि राईले भने, ‘आन्तरिक मामिला तथा कानुनमन्त्रीले राजीनामा दिएपछि उहाँले सम्हाल्दै आउनुभएको प्रवक्ताको जिम्मेवारी मलाई जिम्मेवारी तोकिएको छ । यो चैँ अब आन्तरिक मामिला मन्त्री आएपछि स्वतः उहाँले जिम्मेवारी सम्हाल्नुहुनेछ ।’
जापान भ्रमणमा गएका मन्त्री अधिकारीले विवादमा तानिएपछि उनले बुधबार राजीनामा दिएसँगै बुधबार नै मन्त्रिपरिषद् बैठक बसेर राईलाई प्रवक्ताको जिम्मेवारी दिइएको हो ।
यसअघि भौतिक पूर्वाधार विकास मन्त्रालयको मात्रै जिम्मेवारी सम्हालिरहेका उनलाई कात्तिक ८ गते मुख्यमन्त्री हिक्मत कार्कीले स्वास्थ्य मन्त्रालयको जिम्मेवारी दिएका थिए ।
यसैबीच बुधबारको मन्त्रिपरिषद् बैठकले संघीयता कार्यान्वयन तथा प्रदेश कानून निर्माण कार्यदलको समयावधि थप गर्ने निर्णय गरेको प्रवक्ता राईले जानकारी दिए ।
त्यस्तै खोरेत रोग नियन्त्रण आयोजना सञ्चालन सम्बन्धि कार्यविधि २०८१ स्वीकृत गर्ने, नोभेम्बर ११ मा अजरबैजानको राजधानी बाकुमा हुने संयुक्त राष्ट्रसंघीय प्रारुप महासन्धीको पक्ष राष्ट्रहरूको बैठक (कोप २९) मा पर्यटन वन तथा वातावरण मन्त्री सदानन्द मण्डल र सचिव विशाल घिमिरेलाई सहभागी गराउने निर्णय भएको उनले बताए ।
यसैगरी १० औँ राष्ट्रिय खेलकुदको तयारी तथा व्यवस्थापनका लागि थप ९ करोड रुपैयाँ बजेट स्वीकृत गर्ने निर्णय भएको छ ।
Discussion about this post