धरान : कोशी प्रदेश प्रिमियर लिग फुटबल आजबाट धरानमा सुरू भएको छ ।
सोमबार धरान रगशालामा सुरू भएको खेलमा उदयपुरको गाइघाट फुटबल क्लब र ताप्लेजुङको प्रगतिशील युवा क्लब विजयी हुँदै आ–आफ्नो समूहको शीर्ष स्थानमा उक्लिएका छन् ।
पहिलो खेलमा गाइघाट फुटबल क्लबले भाजपुरको लाइबेरी फुटबल क्लबलाई ३–० गोल अन्तरले पराजित गर्दै तीन अंकसहित समूह बी को शीर्ष स्थानमा रहेको छ । गाइघाटको जितको लागि प्रविन राईले २ गोल गरेका थिए भने प्रितम चौधरीले १ गोल थपेका थिए ।
खेलको म्यान अफ द म्याच घोषित हुँदै प्रविन राईले नगद पाँच हजारसहित ट्रफी हात पारे ।
त्यस्तै सोमबार नै भएको दोस्रो खेलमा सुनसरीको धरान फुटबल क्लबलाई २–१ गोल अन्तरले पराजित ताप्लेजुङको प्रगतिशील युवा क्लब तीन अंकसहित समूह डी को शीर्ष स्थानमा रहेको छ ।
प्रगतिशीलको जितका लागि सविन तामाङ र अनुप सेन्दोङले गोल गरेका थिए भने धरान फुटबल क्लबका सविन राईले १ गोल फर्काएका थिए ।
खेलको म्यान अफ द म्याच प्रगतिशील युवा क्लबका सविन तामाङ घोषित हुँदै नगद पाँच हजार पुरस्कार प्राप्त गरे ।
कोशी प्रदेश फुटबल संघको आयोजनामा फागुन ८ गतेसम्म सञ्चालन हुने प्रतियोगितामा ११ जिल्लाका जिल्ला लिग च्याम्पियनहरूको सहभागीता रहेको कोशी प्रदेश फुटबल सघका अध्यक्ष किशोर राईले जानकारी दिए ।
प्रतियोगिताको विजेता र उपविजेता टिम राष्ट्रिय लिगको छनौटका लागि हुने अन्तर प्रादेशिक लिग खेल्न छनौट हुनेछन् । प्रतियोगिताको विजेताले दुई लाख, उपविजेताले एक लाख ५० हजार, तेस्रो हुने टिमले एक लाख २५ हजार र चौथो हुने टिमले एक लाख नगद पुरस्कार प्राप्त गर्नेछन् ।
प्रतियोगिताको उद्घाटन कोशी प्रदेशका वन, वातावरण तथा पर्यटन मन्त्री सदानन्द मण्डलले गरेका थिए ।
Discussion about this post