इटहरी : विराटनगरको महेन्द्र मोरङ आदर्श बहुमुखी क्याम्पसमा झडप भएको छ । नेपाल विद्यार्थी संघ (नेविसंघ) का दुई समूहबीच झडप हँदा तीन जना घाइते भएका छन् ।
घाइते हुनेमा नेविसंघ मोरङका जिल्ला सभापति सरोज पोखरेल, सचिव गुड्डु साह र महेन्द्र मोरङमै अध्ययनरत नेविसंघ केन्द्रीय सदस्य पूजा विश्वास रहेका छन्।
नेपाली कांग्रेसको भ्रातृ संगठन नेविसंघमा आवद्ध पार्टी सभापति शेरबहादुर देउवा र डा. शेखर कोइराला पक्षधर विद्यार्थीबीच बिहीबार झडप भएको हो ।
घाइते भएका तीनै जना कोइराला पक्षधर हुन् ।
महेन्द्र मोरङका स्ववियुका सभापति जसवन्त पौडेलसहितको समूहले आक्रमण गरेको घाइतेहरूको आरोप छ ।
स्ववियुको चुनाव लागेकाले क्याम्पसको वस्तुस्थिति बुझ्न जिल्ला सभापति र सचिव आएका बेला आक्रमण भएको घाइते पूजा विश्वासले बताइन्। उनका अनुसार सुरुमा मुक्का प्रहार गरिएपछि बञ्चरोले आक्रमण गर्न खोजिएको थियो ।
यता, स्ववियु सभापति पौडेलले भने विना जानकारी क्याम्पसमा नेविसंघको नयाँ इकाई गठन गर्न खोजिएपछि विवाद भएको बताए ।
‘म पहिले क्याम्पसको नेविसंघ सभापति थिएँ । स्ववियु सभापति भएपछि प्रशान्त यादवलाई कार्यवाहक दिएँ । कामकारबाही राम्ररी नै चलिरहेको छ। एक्कासी नयाँ इकाई समिति गठन गर्न खोजिएपछि विवाद बढेर झडप भएको हो,’ उनले भने ।
पौडेल पार्टी सभापति देउवा पक्षधर हुन् । पौडेलका अनुसार नेविसंघका जिल्ला सभापति पोखरेल क्याम्पसमा नयाँ इकाई समिति बनाउने तयारीका साथ आएका थिए ।
मोरङ प्रहरीका डीएसपी मदन केसीले घटनाको अनुसन्धान गरिरहेको जानकारी दिए ।
Discussion about this post