धरान : लागुऔषध (गाँजा)ओसारपसारमा संलग्नलाई नियन्त्रणमा लिन प्रहरीले गोली चलाएको छ ।
बुधबार मध्यरातमा धरान उपमहानगरपालिका–२० चिमफुले खोलामा गोली चलाएर दुई सय २५ किलोग्राम गाँजासहित एक जनालाई नियन्त्रणमा लिएको प्रहरीको भनाइ छ ।
पक्राउ पर्नेमा धनकुटाको साँगुरीगढी गाउँपालिका–९ का ४३ वर्षीय हरिकुमार राई रहेका छन् । सुनसरी प्रहरी प्रमुख, एसपी सुमनकुमार तिम्सिनाका अनुसार हवाईफायर गरेर उनलाई पक्राउ गरिएको हो ।
विशेष सूचनाका आधारमा इलाका प्रहरी कार्यालय र वडा प्रहरी कार्यालय धरान तथा अस्थायी प्रहरी पोस्ट जोरसखुवाबाट संयुक्त टोलीले उनलाई नियन्त्रणमा लिएको तिम्सिनाले जानकारी दिए ।
प्रहरीलाई देख्नसाथ विष्णुपादुकाबाट रेलवेतर्फ आउने जंगलको भित्री बाटोमा गाँजा फालेर फरार भएका थिए । जंगलतर्फ फरार भएको समूहलाई नियन्त्रणमा लिनका लागि गोली चलाइएको तिम्सिनाले बताए ।
लागुऔषध गाँजा ओसारपसारमा संलग्न भरियलाई नियन्त्रणमा लिने क्रममा ‘टाइप–५४’ पेस्तोलबाट तीन राउण्ड हवाईफायर गरिएको हो ।
गाँजा ओसारपसारमा संलग्न अन्य व्यक्तिहरू फरार रहेकाले खोजी तीव्र पारिएको प्रहरीको भनाइ छ । घटनामा नौ वटा प्लाष्टिकका बोरामा ‘प्याक’ गरिएको दुई सय २५ किलो गाँजा बरामद गरिएको हो ।
पक्राउ परेका राईमाथि इलाका प्रहरी कार्यालय धरानको हिरातमा राखेर थप अनुसन्धान भइरहेको सुनसरी प्रहरीले जनाएको छ ।
Discussion about this post