तरहरा : इटहरी २० तरहरामा ग्याङ फाइट भएको छ । आज (आइतबार)बिहान करिब १० बजेतिर ग्याङ फाइट भएको हो ।
फाइटमा एक युवकको घाँटीमा धारिलो हतियार प्रहार भएको छ भने अर्का युवकको टाउकोमा चोट लागेको छ ।
स्थानीय आकाश गिरी तरकारी किन्नका लागि पसल गएका थिए । सोही मौकमा छोपेर इटहरी २० तरहरास्थित धनपुरी मार्ग बस्ने सुशानजङ्ग घिमिरेको समूहले उनीमाथि आक्रमण गरेको थियो ।
इलाका प्रहरी कार्यालय इटहरीका डीएसपी लक्ष्मी भण्डारीका अनुसार झगडामा दुईजना घाइते भएका छन् ।
इटहरी २ घर भएका २५ वर्षीय पारस भनिने किरन राईको घाँटीमा चोट लागेको डीएसपी भण्डारीले जानकारी दिए । उनको अहिले धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
यसैगरी इटहरी २० तरहरा घर भएका अन्दाजी ४० वर्षीय वीरेन (बाबु) बुढाथोकीको टाउकोमा चोट लागेको छ । उनको इटहरीमा सामान्य उपचारपछि थप उपचारका लागि आफन्तको जिम्मामा विराटनगर पठाइएको डीएसपी भण्डारीले जानकारी दिए ।
यद्यपि, दुवै घाइतेलाई प्रहरीले निगरानीमा राखेको छ ।
घटनामा इटहरी २० बस्ने १९ वर्षीय सुशानजङ्ग घिमिरे, इटहरी २ बस्ने २३ वर्षीय अरुण राई, इटहरी २ बस्ने नितेस बुढाथोकीलाई प्रहरीले नियन्त्रणमा लिएको छ ।
‘पुरानो रिसिइबीका कारण दुई समूहबीच झडप भएको देखिन्छ,’ डीएसपी भण्डारीले टाकुरा न्यूजसँग भने, ‘दुवै घाइतेमाथि डिटेलमा बुझ्न नपाएका कारण र थप अनुसन्धान भइनसकेकाले ठ्याक्कै के कारण घटना भएको भन्न सकिन्न ।’
उनका अनुसार घाइतेको उपचारपछि उनीहरूमाथि र पक्राउ परेका दुवै समूहका व्यक्तिहरूमाथि अनुसन्धान भइसकेपछि थप विवरण खुल्नेछ ।
खासगरी बुढाथोकी तरहरामा कवाडी पसल सञ्चालन गर्दै आएका थिए । उक्त पसलमा आकाश गिरीले काम गर्दै आएका थिए । आइतबार बिहान घिमिरेको समूहले गिरीमाथि सुरूमा प्रहार गरेको थियो ।
त्यसपछि दुई समूहबीच झडप भएको प्रहरीको प्रारम्भिक अनुसन्धानबाट खुलेको छ ।
उक्त घटना योजनाबद्ध किसिमले भएको र मुख्य योजनाकार घिमिरे रहेको प्रहरीको निष्कर्ष छ । उनको समूहमा अरू मानिस पनि रहेकाले खोजी कार्य भइरहेको प्रहरीको भनाइ छ । घटनामा गिरी भने फरार छन् । उनको खोजी कार्य भइरहेको छ ।
इटहरी २ बाट आएको समूहले खुकुरीसँगै फलामका अन्य सामाग्रीसमेत बोकेर आएको प्रत्यक्षदर्शीले बताएका छन् ।
घटनामा संलग्नमाथि सुनसरी जिल्ला अदालतबाट म्याद थप गरी आवश्यक अनुसन्धान गरिने तयारी रहेको इलाका प्रहरी कार्यालय इटहरीले जनाएको छ ।
डीएसपी भण्डारीले भने, ‘दुवै समूहका मानिसमाथि अनुसन्धान र संलग्न अन्यको पनि खोजी कार्य गरी आवश्यक कारबाहीको प्रक्रिया अगाडि बढाइएको छ ।’
Discussion about this post