इटहरी : नेपाली कांग्रेस क्षेत्र नं. २ (क) सुनसरीले बिहीबार इटहरीमा ‘हामीले भनेको गणतन्त्र’ शीर्षकको कार्यक्रम आयोजना गरेको छ।
१८ औँ गणतन्त्र दिवसको अवसरमा आयोजित उक्त कार्यक्रममा पार्टीका केन्द्रदेखि स्थानीय तहसम्मका नेताहरूको उपस्थिति रहेको थियो।
कार्यक्रमका प्रमुख वक्ता तथा कांग्रेसका सह-महामन्त्री भीष्मराज आङ्देम्बेले गणतन्त्र स्थापनामा कांग्रेसले खेलेको ऐतिहासिक भूमिका स्मरण गर्दै गणतन्त्रको संरक्षण, सुदृढीकरण र सशक्तीकरण कांग्रेसको प्रमुख जिम्मेवारी भएको बताए।
“गणतन्त्र नेपालजस्तो विविधतापूर्ण समाजमा सामाजिक न्याय, समानता र समावेशिताको लागि अपरिहार्य संरचना हो,” उनले भने, “आज विभिन्न नाममा भइरहेका आन्दोलनहरूलाई हेर्दा जनतामाझ अझ प्रष्ट ढंगले गणतन्त्रको मर्म पुर्याउनु आवश्यक छ।”
उनले गणतन्त्र प्राप्तिका निम्ति कांग्रेसले खेलेको भूमिका र गणतन्त्र प्राप्तिपछि देशमा भएका उपलब्धिको चर्चा गरे ।
गणतन्त्र नै देशकौ मुलभूत आवश्यकता रहेको औल्याउँदै उनले विद्यमान अवस्थामा कांग्रेसले गणतन्त्रको सकारात्मक पक्षबारे आम मानिसलाई अवगत गराउनुपर्ने बताए ।
उनले देशमा अहिले भइरहेका विभिन्न नामका आन्दोलनप्रति लक्षित गर्दै अहिलेको आवश्यकता गणतन्त्र नै रहेको जिकिर गरे ।
कार्यक्रममा कांग्रेस केन्द्रीय सदस्य राजीव ढुंगाना, पूर्व राज्यमन्त्री सीताराम मेहता, कांग्रेस सुनसरी सभापति केदार भण्डारी, महाधिवेशन प्रतिनिधि विकास केसी, रामधुनी नगर सभापति सुदीप अधिकारीलगायतले आ–आफ्ना धारणा राखे।
उनीहरूले कांग्रेसले परिकल्पना गरेको समावेशी र उत्तरदायी गणतन्त्रको सन्देश जन–जनमा पुर्याउन आवश्यक रहेको बताए ।
कांग्रेस क्षेत्र नं. २ (क)का सभापति सुबेक्छु देवानका अनुसार कांग्रेसले चाहेको गणतन्त्रबारे बुझाउन उक्त कार्यक्रमको आयोजना गरिएको हो । अघिल्लो वर्षहरूमासमेत उक्त किसिमको कार्यक्रम गरिएको उनले स्मरण गरे ।
खासगरी बिहीवार १२ वटा वडाका २४ जना अग्रज नेता तथा कार्यकर्तालाई सम्मानसमेत गरिएको देवानले बताए ।
Discussion about this post