मोरङ : मोरङको जिल्ला प्रहरी कार्यालयको हिरासतमा रहेका २८ वर्षीय एक युवकको मृत्यु भएको छ । मृत्यु हुनेमा झापाको दमक नगरपालिका–१ का पुण्यबहादुर श्रेष्ठ रहेका छन् ।
श्रेष्ठको उपचारका क्रममा विराटनगरको कोशी अस्पतालमा २०८१ सालको आज (मंगलबार) बिहान ११ः३० बजेतिर मृत्यु भएको बताइएको छ। हिरासतमा रहेका बेला उनलाई ज्वरो आउने, पेट दुख्ने र श्वासप्रश्वासमा समस्या देखिएपछि उपचारका लागि अस्पताल लगिएको थियो।
यसअघि पनि बारम्बार बिरामी पर्ने गरेपछि प्रहरीले उनलाई उपचारका लागि अस्पताल भर्ना गरेको थियो।
प्रहरीका अनुसार श्रेष्ठ लामो समयदेखि परिवारको सम्पर्कमा नरहेको र अपराधिक पृष्ठभूमिका व्यक्ति थिए । पछिल्लो पटक विराटनगरमा साइकल चोरी गर्न खोजेपछि उनलाई प्रहरीले पक्राउ गरेर अनुसन्धान गरिरहेको थियो ।
साइकल चोरी गर्न खोजेको देखेपछि साइकलका धनी पुग्दा हातपात र दुव्र्यवहार गरेको भनेर किटानी जाहेरी परेपछि पक्राउ गत जेठ १५ गते गरिएको थियो ।
शव कोशी अस्पतालमै राखिएको छ । प्रहरी हिरासतमै रहेका बेला बिरामी हुनु र उपचारको क्रममा मृत्यु हुनुले प्रहरी हिरासतमा हुने स्वास्थ्य र मानवअधिकारको प्रश्नलाई पुनः उठाएको छ। मृतकका परिवारले भने प्रहरी हिरासतमा कुटपिट भएको शंका व्यक्त गरेका छन् ।
श्रेष्ठमाथि यसअघि लागूऔषध र अभद्र व्यवहारसहितका चारवटा मुद्दा चलिसकेको प्रहरीको रेकर्ड छ। तर यो पटकको मृत्युले ‘अपराधीको पनि जीवन र स्वास्थ्यप्रति राज्य जिम्मेवार हो’ भन्ने सवाल उठाएको छ।
‘हिरासतमा नियमित स्वास्थ्य परीक्षण, निगरानी र मानवअधिकारको संरक्षण कति प्रभावकारी थियो ?,’ मृतकका एक आफन्तले भने, ‘मृत्युको कारणबारे स्पष्ट निष्कर्ष आउन अझै बाँकी छ। तर हिरासतमा रहेको मान्छेको मृत्यु हुनु आफैँमा गम्भीर विषय हो, जसको गहिरो अनुसन्धान र जवाफदेहिता आवश्यक छ ।’
Discussion about this post