इटहरी : सुनसरी र धनकुटाबाट प्रहरीले लागूऔषधसहित चार जनालाई पक्राउ गरेको छ। सुनसरीको इनरुवा र धरान तथा धनकुटाको भेडेटार क्षेत्रबाट उनीहरू पक्राउ परेका हुन्।
इनरुवा नगरपालिका–४ स्थित बसपार्क क्षेत्रमा चेकजाँचका क्रममा बागमती प्रदेश प्र.०२–०५२ प ७७५७ नम्बरको स्कुटरमा सवार दुधौली नगरपालिका–१०, सिन्धुलीका ३३ वर्षीय अर्जुन कटुवाललाई प्रहरीले २७ ग्राम ९२ मिलिग्राम ब्राउन सुगरसहित नियन्त्रणमा लिएको छ।
अनुसन्धानका क्रममा लागूऔषध ओसारपसारमा संलग्न रहेको आशंकामा उदयपुरको कटारी नगरपालिका–२ निवासी ३३ वर्षीय सुमन माझीलाई पक्राउ गरिएको प्रहरीले जनाएको छ।
त्यसैगरी, धरान उपमहानगरपालिका–१६ बाट अस्थायी प्रहरी चौकी रेल्वेले ३४ वर्षीय रोहित विष्टलाई १ ग्राम २० मिलिग्राम ब्राउनसुगरसहित नियन्त्रणमा लिएको हो।
उता, इलाका प्रहरी कार्यालय भेडेटार, धनकुटाले साँगुरीगढी गाउँपालिका–६ स्थित चेकजाँचका क्रममा प्रदेश १–०२–००१ज ४५२७ नम्बरको सवारीसाधनमा लुकाई ल्याइरहेको १० किलोग्राम गाँजा बरामद गरेको छ। गाँजासहित गाडी चालक धनकुटा नगरपालिका–९ का २० वर्षीय बालकृष्ण मगरलाई प्रहरीले नियन्त्रणमा लिएको हो।
पक्राउ परेका सबै विरुद्ध लागूऔषध सम्बन्धी मुद्दा दर्ता गरि थप अनुसन्धान भइरहेको प्रहरीले जनाएको छ।
Discussion about this post