इटहरी : सुनसरी र मोरङमा भएका छुट्टाछुट्टै सवारी दुर्घटनामा दुई जनाको मृत्यु भएको छ।
सुनसरीको रामधुनी नगरपालिका–२ स्थित सडक खण्डमा स ६ प १२९५ नम्बरको मोटरसाइकलले बाटो क्रस गर्दै गरेका एक साइकल यात्रीलाई ठक्कर दिँदा गम्भीर घाइते भएका भारतको कलकत्ता घर भई हाल सोही स्थानमा बस्दै आएका ६५ वर्षीय निर्मल साहको मृत्यु भएको हो।
घाइते साहलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान घोपामा लगिएको थियो। उपचारको क्रममा उनको मृत्यु भएको प्रहरीले जनाएको छ ।
घटनापछि मोटरसाइकल चालक सप्तरीको डाक्नेश्वरी नगरपालिका–५ निवासी ३५ वर्षीय जितेन्द्र मण्डललाई प्रहरीले नियन्त्रणमा लिएको जिल्ला प्रहरी कार्यालय सुनसरीले जनाएको छ।
त्यस्तै, मोरङको रंगेली नगरपालिका–७ मा को २ च १३०० नम्बरको पिकअप गाडी सडकको डिभाइडरमा ठोक्किँदा चालक विराटनगर–८ निवासी ४५ वर्षीय चेतराज खनालको घटनास्थलमै मृत्यु भएको छ।
दुबै घटनाका सम्बन्धमा सम्बन्धित प्रहरी कार्यालयहरूले थप अनुसन्धान गरिरहेका छन्।
Discussion about this post