विराटनगर : कोशी प्रदेश सरकारअन्तर्गत रहेको मनमोहन प्राविधिक विश्वविद्यालयका विद्यार्थीहरूले नेपाली जडीबुटीको अनुसन्धानमार्फत चार प्रकारका आयुर्वेदिक औषधि उत्पादन गरेका छन्।
भिक्स, बाम र सन्चो जस्ता गुणस्तरीय औषधिको उत्पादन गरी विश्वविद्यालयले त्यसको नाम ‘मनमोहन ओखती’ राखेको छ। उत्पादन भइसके पनि बजारमा लैजान विश्वविद्यालय अहिले सरकारको अनुमोदन र प्रबर्द्धनको पर्खाइमा छ।
फार्मेसी विज्ञानमा स्नातक तहमा अध्ययनरत विद्यार्थीहरूले भारतको पतञ्जली आयुर्वेद प्रतिष्ठानका अनुसन्धानकर्ता डा। सुनील कुमार शुक्लाको सहयोगमा उत्पादन गरेका यी औषधिहरू विदेशबाट आयात हुने औषधिको प्रतिस्थापन हुने दाबी गरिएको छ।
उपकुलपति डा. सुवासश्री पोखरेलका अनुसार औषधि उत्पादनमा प्रयोग भएका कच्चा पदार्थ कोशी प्रदेशमै पाइने जडिबुटीहरू हुन्।
उनका अनुसार यसले प्रदेशमै स्रोत, ज्ञान र प्रविधिको प्रयोग गरेर आत्मनिर्भर औषधि प्रणालीको उदाहरण पेश गरेको छ।
मनमोहन विश्वविद्यालयले आयुर्वेदिक औषधिको मात्र नभई मधुमेह उपचार र ब्याक्टेरियोफेज सम्बन्धी आधुनिक औषधि उत्पादनबारे पनि अनुसन्धान अगाडि बढाएको छ। विश्वविद्यालय अन्तर्गत रहेको अनुसन्धान केन्द्रले हाल विभिन्न १० वटा अनुसन्धान परियोजना सञ्चालन गरिरहेको छ।
अनुसन्धान केन्द्रले विज्ञान, प्रविधि, ईन्जिनियरिङ, चिकित्सा, कृषि र वन वातावरणका क्षेत्रमा अनुसन्धान गरेर विद्यार्थी र युवा वैज्ञानिकहरूलाई प्रेरित गर्ने वातावरण बनाएको छ।
फार्मेसी शिक्षालाई व्यावहारिक बनाउन विश्वविद्यालयले अमेरिकी प्रविधिमा आधारित आधुनिक प्रयोगशाला निर्माण गरेको छ। यसै प्रयोगशालामा विद्यार्थीहरूले औषधि उत्पादनसम्बन्धी व्यवहारिक ज्ञान प्राप्त गरेका छन्।
रजिष्ट्रार डा. दिलनाथ फुँयालका अनुसार विश्वविद्यालयका सबै कार्यक्रमहरूमा ४० प्रतिशत सैद्धान्तिक र ६० प्रतिशत व्यवहारिक कोर्ष समावेश गरिएको छ।
२०७६ मा स्थापना भएको मनमोहन प्राविधिक विश्वविद्यालयले २०७८ देखि विभिन्न प्राविधिक तहका कार्यक्रम सञ्चालन गर्दै आएको छ। सिभिल, इलेक्ट्रिकल, फार्मेसी, अस्पताल व्यवस्थापन, कानुन र अपराधशास्त्रदेखि डिप्लोमा तहका आठ कार्यक्रमहरूसमेत सञ्चालन भइरहेका छन्।
अब विश्वविद्यालयले आगामी वर्षदेखि शिक्षण अस्पतालमार्फत चिकित्सा शिक्षाको विस्तार गर्ने तयारी समेत थालेको छ।
Discussion about this post