धरान : धरानमा सम्पन्न प्रथम मदन भण्डारी स्मृति महिला फुटबल प्रतियोगिताको उपाधि धरान लेडिज फुटबल क्लबले जितेको छ।
शनिबार धरान–१६ स्थित रंगशालामा सम्पन्न फाइनल खेलमा धरान लेडिज फुटबल क्लबले फेयर फुटबल क्लबलाई २–० गोलअन्तरले पराजित गर्दै उपाधि उचालेको हो।
धरान सिटी फुटबल क्लबको आयोजनामा भएको प्रतियोगिताको फाइनल खेलमा धरान लेडिज क्लबकी सुनीता राईले दुवै गोल गरेकी थिइन्। उत्कृष्ट प्रदर्शन गरेकी उनी ‘म्यान अफ द म्याच’ समेत घोषित भइन्।
विजेता टिमले नगद ५० हजार रुपैयाँसहित ट्रफी प्राप्त गर्यो भने उपविजेता फेयर फुटबल क्लबले २५ हजार रुपैयाँसहित ट्रफी प्राप्त गर्यो।
प्रतियोगिताको उत्कृष्ट खेलाडीको उपाधि धरान लेडिज फुटबल क्लबकी प्रतीक्षा राईले प्राप्त गरिन्। यस्तै, उत्कृष्ट गोलकर्ता विनु राई, उत्कृष्ट डिफेन्डर आयुषा राई, र उत्कृष्ट मिडफिल्डर कुष्मा राईले क्रमशः २/२ हजार रुपैयाँ नगद पुरस्कार प्राप्त गरे।
फेयर फुटबल क्लबकी प्रसन्न राई ‘बेष्ट स्ट्राइकर’ घोषित भइन् भने धरान लेडिजका प्रशिक्षक अर्जुन राई ‘बेष्ट कोच’ घोषित भए। दुवैले नगद २ हजार पुरस्कार पाए।
सर्वाधिक ६ गोल गर्दै सुनीता राई र इजिनसा लिम्बुले संयुक्त रूपमा ‘सर्वोत्कृष्ट गोलकर्ता’ को उपाधि हात पारे। दुवैले नगद २/२ हजार पुरस्कार पाए।
त्यस्तै, प्रतियोगिताको ‘उत्कृष्ट टिम’ को रूपमा पट्नाली फुटबल क्लब चयन हुँदै नगद ३ हजार रुपैयाँ पुरस्कार प्राप्त गर्यो। ‘उत्कृष्ट खेलाडी’ धरान लेडिज क्लबकी जुना राई घोषित हुँदै उनले ५ हजार रुपैयाँ पुरस्कार पाएकी छन्।
प्रतियोगिताको पुरस्कार वितरण कार्यक्रममा कोशी प्रदेशकी सांसद यसोदा कायस्थ, अखिल नेपाल फुटबल संघ (एन्फा)का मानार्थ उपाध्यक्ष किशोर राई, धरान फुटबल क्लबका अध्यक्ष प्रताप तामाङ तथा आयोजक धरान सिटी क्लबका अध्यक्ष सागर घिमिरेलगायतको उपस्थिति थियो।
नकआउट आधारमा खेलाइएको प्रतियोगितामा धरानका आठ वटा क्लबले सहभागिता जनाएका थिए।
Discussion about this post