झापा : झापाको शिवसताक्षी नगरपालिका ९ मा १९ वर्षीय रोमन थापा र १५ वर्षीय आदित्य तामाङको साथीको कुटपिटबाट मृत्यु भएको छ। ट्युसनबाट फर्कंदै गरेका बेला आफ्नै साथीसँगको झगडाले उनीहरूको ज्यान गएको हो।
बिर्तामोडस्थित बी एन्ड सी अस्पतालमा उपचारका क्रममा आदित्यको बुधबार मृत्यु भएको जिल्ला प्रहरी कार्यालय झापाका निमित्त प्रवक्ता तथा इन्स्पेक्टर प्रवीण श्रेष्ठले जानकारी दिए।
यसअघि आइतबार आदित्यकै मिल्ने साथी रोमन थापाको बिर्तासीटी अस्पतालमा मृत्यु भएको हो।
प्रहरीका अनुसार केही दिनअघि ट्युसन पढेर फर्कंदै गरेका आदित्य र रोमनमाथि ध्रुवतारा अंग्रेजी माध्यमिक विद्यालयका केही विद्यार्थीले कुटपिट गरेका थिए।
प्रत्यक्षदर्शीहरूका अनुसार सुरुमा सामान्य विवाद जस्तो देखिए पनि केही बेरमै ती विद्यार्थीहरूले फेरि बोलाएर उनीहरूलाई आक्रमण गरेका थिए।
कुटपिटपछि आदित्यले घरमा केही जानकारी गराएनन्। उनी भोलिपल्ट ट्युसन जान छोडे पनि विद्यालय भने गएका थिए।
विद्यालयमा उनले अनुहार सुन्निएको र ढाड दुखेको बताएपछि परिवारले उनलाई शुक्रबार अस्पताल लगिएको थियो। पाँच दिनसम्म उपचार गर्दा पनि स्वास्थ्यमा सुधार नआएपछि उनको पनि मृत्यु भएको हो।
दुवै किशोर एउटै ट्युसन सेन्टरमा पढ्थे र नजिकका साथी थिए। कुटपिटमा संलग्न भएको आरोपमा प्रहरीले ६ जना किशोरलाई नियन्त्रणमा लिएको छ। प्रारम्भिक बयानमा ती सबैले घटनामा संलग्नता स्वीकार गरेको प्रहरीले जनाएको छ। उनीहरू सबै विद्यालय पढ्ने उमेरका हुन्।
घटनामा संलग्न अन्य व्यक्ति पनि हुनसक्ने आशंका गरिएको छ। अनुसन्धानका क्रममा अधिकांश संलग्न विद्यार्थीहरू ध्रुवतारा अंग्रेजी माध्यमिक विद्यालयकै भएको खुलेको छ।
केही साथीहरूले दोषीमाथि प्रतिशोध लिनुपर्ने भन्दै आक्रोश व्यक्त गरे पनि मृतक आदित्यले उल्टै ‘छोडिदेऊ, झगडा नगरौं’ भनेर साथीसँग आग्रह गरेका थिए।
दुवै मृतकका परिवारले घटनाको निष्पक्ष छानबिन र दोषीमाथि कडा कानुनी कारबाहीको माग गरेका छन्।
स्थानीयवासीले विद्यालयको भूमिका र बढ्दो किशोर ग्याङ हिंसाप्रति चिन्ता व्यक्त गरेका छन्।
प्रहरीका अनुसार घटनामा संलग्नहरू नाबालक भएकाले उनीहरूलाई बालअपराधसम्बन्धी ऐनअनुसार कानुनी प्रक्रिया अघि बढाइनेछ।
Discussion about this post