झापा : झापाको अर्जुनधारा नगरपालिकामा एक युवतीको सामूहिक कुटपिटबाट मृत्यु भएको छ।
श्रीमान् अर्की महिलाको कोठामा गएको थाहा पाएपछि पत्नीले साथीहरू बोलाई सामूहिक आक्रमण गराउँदा २२ वर्षीया युवतीको ज्यान गएको हो।
मृत्यु हुनेमा अर्जुनधारा नगरपालिका–४ भाङवारी घर भएकी र अर्जुनधारा–८ शनिश्चरे क्याम्पस नजिक डेरा गरी बस्दै आएकी गंगा राई रहेकी छन्।
इलाका प्रहरी कार्यालय बिर्तामोडका अनुसार घटना मंगलबार राति करिब ११ः३० बजे भएको हो।
भोजपुरको रामप्रसादराई गाउँपालिका–६ वैकुण्ठे घर भई अर्जुनधारा–८ मा बस्दै आएकी ३२ वर्षीया सुस्मिता भुसालले आफ्ना श्रीमान् रमेश भुसाल गंगाको कोठामा गएको थाहा पाएपछि टोलकै केही महिलालाई बोलाएर आक्रमण गराएकी थिइन्।
भुसालले आफू सँगै बस्ने टोलकी महिलाहरू ५४ वर्षीया मैया श्रेष्ठ, ३८ वर्षीया बबिता विक, २४ वर्षीया मेनुका पाँचकोटी र ६० वर्षीया नर्बदा सुनदासलाई बोलाएर गंगाको डेरामा पुगेर आक्रमण गराएकी हुन्। सामूहिक कुटपिटबाट गंगा गम्भीर घाइते भएकी थिइन्।
घाइते गंगालाई सुरुमा शनिश्चरेस्थित शंकर अस्पताल लगिएको थियो।
त्यहाँ प्राथमिक उपचारपछि उनलाई थप उपचारका लागि बिर्तामोडस्थित बिर्तासिटी अस्पताल लगिएको थियो। तर, बुधबार बिहानको राति १ः२० बजे उपचारकै क्रममा उनको मृत्यु भएको डीएसपी विजय श्रेष्ठले जानकारी दिए।
प्रहरीका अनुसार यो घटना व्यक्तिगत रिसइबी र आन्तरिक पारिवारिक दरारकै कारण भएको देखिएको छ। श्रीमान् रमेश भुसाल र गंगा राईबीच पहिलेदेखि चिनजान रहेको खुलेको भए पनि उनीहरूको सम्बन्धबारे यकिन प्रमाण भने अहिलेसम्म नखुलेको प्रहरीले जनाएको छ।
घटनामा संलग्न सुस्मिता भुसाल, उनका पति रमेश भुसाल र आक्रमणमा संलग्न महिलालाई प्रहरीले नियन्त्रणमा लिएको छ। कर्तव्य ज्यान मुद्दा दर्ता गरी अनुसन्धान प्रक्रिया अघि बढाइएको छ।
प्रहरीले घटनाको सुस्पष्टता ल्याउनका लागि सीसीटीभी फुटेज, मोबाइल कल डिटेल्स, सामाजिक सञ्जाल संवाद लगायत डिजिटल प्रमाण संकलनको काम अगाडि बढाएको छ।
Discussion about this post