इटहरी : इटहरी उपमहानगरपालिकाको आगामी आर्थिक वर्ष २०८२।८३ को बजेट पारित हुन सकेन। बुधबार बसेको १६औँ नगरसभा बैठक अर्को सूचना नभएसम्मका लागि स्थगित गरिएको छ।
नगरप्रमुख हेमकर्ण पौडेलले बजेट पारित हुन नदिन नेकपा एमाले इटहरीका नेताहरूले जानाजान अवरोध पुर्याएको आरोप लगाएका छन्। उनका अनुसार एमाले निकटका जनप्रतिनिधिहरूले माग गरेको रकम विनियोजन गर्न नसक्दा बहुमतको आडमा नगरसभा स्थगन गराइएको हो।
‘नेकपा एमाले इटहरीका नेताहरूले मागेको बजेट दिन नसक्दा बहुमतको आडमा नगरसभा स्थगित,’ मेयर पौडेलले सामाजिक सञ्जालमा भनेका छन्, ‘इटहरीबासी बजेटबाट बिमुख ।’
नगरको आवश्यकताअनुसार बजेट निर्माण गरिएपनि केही नेताहरूले आफ्नो वडामा बढी रकम माग्दा सम्भव नहुने देखेपछि नगरसभा स्थगित गरिएको पौडेलले बताए ।
नगरसभा स्थगित भएपछि इटहरीबासी नयाँ बजेटबाट वञ्चित भएका छन्।
उपुप्रमुख संगीता कुमारी चौधरीले गत असार १० गते नगरसभामा प्रस्तुत गरेको विवरण अनुसार कुल अनुमानित बजेट रकम २ अर्ब ५५ करोड २१ लाख रहेको छ।
उपमहानगरले अनुमानित बजेटमध्ये चालु खर्चतर्फ १ अर्ब ४ करोड ११ लाख १० हजार छुट्याएको छ। यस्तै, वित्तीय व्यवस्थातर्फ साँवा र ब्याज भुक्तानीका लागि ९० लाख र पुँजीगत खर्चतर्फ १ अर्ब ३० करोड १९ लाख ९० हजार विनियोजन गरिएको जनाइएको छ।
उपमहानगरले ल्याएको बजेट चालु आर्थिक वर्षको भन्दा एक अर्ब भन्दा कमको हो । चालू आर्थिक वर्ष उपमहानगरले ३ अर्ब ५७ करोड ८४ लाख ५० हजार रुपैयाँको बजेट ल्याएको थियो ।
यस वर्ष महत्वाकांक्षी बजेट ल्याएको भन्दै आलोचनासमेत भएको थियो । तर, आगामी आर्थिक वर्षका लागि नगरसभामा छलफल भएपनि बजेट पास हुन सकेन । बुधबार बसेको १६ आँै नगरसभाको बैठक अर्को सूचना नभएसम्मका लागि स्थगित गरिएको छ ।
Discussion about this post