झापा : झापाको भद्रपुर नगरपालिका–५ मा लागूऔषध कारोबारमा संलग्न एक भारतीय नागरिकलाई प्रहरीले गोली प्रहार गरी पक्राउ गरेको छ।
शनिबार दिउँसो भारतको किसनगञ्जका ३६ वर्षीय मोहम्मद इस्लामलाई शंका लागी जाँच गर्ने क्रममा प्रहरीले नियन्त्रणमा लिन खोज्दा उनी भाग्न प्रयास गर्दै प्रहरीमाथि आक्रमण गरेका थिए।
आत्मरक्षाका लागि प्रहरीले गोली चलाउँदा इस्लाम घाइते भएका हुन्।
लागूऔषध नियन्त्रण ब्युरो काठमाडौं र जिल्ला प्रहरी कार्यालय झापाको संयुक्त टोलीले भित्री सडक खण्डमा इस्लामलाई शंकास्पद अवस्थामा हिँडिरहेको देखेपछि पक्राउ गर्ने प्रयास गरेको थियो।
प्रहरीले उनको साथबाट करिब १ सय २० ग्राम ब्राउन सुगर बरामद गरेको जनाएको छ।
गोली प्रहारबाट घाइते इस्लामलाई तत्काल नियन्त्रणमा लिई उपचारका लागि प्रादेशिक अस्पताल भद्रपुरमा भर्ना गरिएको प्रहरी स्रोतले जनाएको छ।
Discussion about this post