खोटाङ : खोटाङको हलेसी मन्दिर दर्शन गरेर फर्कंदै गरेको यात्रुबाहक गाडी सोमबार बिहान दुर्घटनामा परेको छ ।
प्रदेश २–०–१–००१ ज ००५३ नम्बरको विङ्गर गाडी हलेसी तुवाचुङ नगरपालिका–१ बाहुनीडाँडास्थित डौठे खोलामा बिहान साढे ८ बजे दुर्घटना भएको हो ।
दुर्घटनामा परी एक जनाको मृत्यु भएको छ । मृतकको पहिचान खुलेको छैन ।
हलेसी तुवाचुङ नगरपालिकाका प्रवक्ता कमल गिरीका अनुसार तीन जना घाइते भएका छन्, उनीहरूको अवस्था चिन्ताजनक रहेको छ ।
घाइतेलाई नगरपालिकाको एम्बुलेन्समार्फत घुर्मीस्थित प्राथमिक स्वास्थ्य केन्द्रमा पठाइएको छ ।
जिल्ला प्रहरी कार्यालय खोटाङका सूचना अधिकारी सुशान्त मिश्रले गाडी करिब दुई सय मिटर तल खसेको जानकारी दिए ।
गाडीमा करिब १७ जना सवार रहेको अनुमान गरिएको छ । घटनाबारे थप विवरण संकलन भइरहेको प्रहरीले जनाएको छ ।
Discussion about this post