झापा : झापा गाउँपालिका–१ लसुनामा मादक पदार्थ सेवन गरेर छिमेकीको घर छेउ पुगेका एक वृद्ध रुखमा बाँधिएको अवस्थामा मृत फेला परेका छन्।
प्रहरीका अनुसार मृतक ६० वर्षीय जतन सोरेन मंगलबार राति साढे १० बजे मादक पदार्थ सेवन गरी छिमेकी महादेव टुडुको घर छेउ पुगेका थिए।
स्थानीयले बताएअनुसार उनले गल्लीमा आएर चिच्याउन थालेपछि छिमेकी टुडु लगायतले उनलाई नियन्त्रणमा लिँदै घर छेउको आमको रूखमा प्लास्टिकको डोरीले बाँधेर राखेका थिए।
तर, बुधबार बिहान ४ बजे सोरेनको शव अवस्थामा फेला परेको जिल्ला प्रहरी कार्यालय झापाले जनाएको छ।
घटनाको जानकारी पाएलगत्तै प्रहरी घटनास्थल पुगेको थियो। प्रारम्भिक अनुसन्धानपछि मृतकका छोरा २७ वर्षीय अनतलाल सोरेन, छिमेकी महादेव टुडु, २० वर्षीय लुखिराम टुडु र २१ वर्षीय लखिराम टुडुलाई प्रहरीले नियन्त्रणमा लिएको छ।
जिल्ला प्रहरी कार्यालय झापाका प्रवक्ता खगेन्द्रबहादुर खड्काका अनुसार घटनामा संलग्न अन्य व्यक्तिहरुको खोजी कार्य पनि जारी छ। शव पोस्टमार्टमका लागि मेचीनगरस्थित भद्रपुर अस्पताल पठाइएको छ।
घटनाका बारेमा थप अनुसन्धान भइरहेको प्रहरीले जनाएको छ।
Discussion about this post