इटहरी : शनिबार दिउँसो, इटहरी–धरान सडकखण्डको चारकोसे झाडीमा भीड बाक्लिँदै गयो। सडकको छेउमा बसको अगाडिको भागमा स्कुटर च्यापिएको र स्कुटरमा सवार दुई युवक सडकमा ढले ।
स्कुटरमा सवार रहेका झापाको बिर्तामोड नगरपालिका ५ का अन्दाजी २५–२६ वर्षका सुजन बिक र सुरज बिकको दुर्घटनामा ज्यान गएको हो ।
तरहरा प्रहरी चौकीका प्रहरी नायब निरीक्षक (सई) टीका नेपालका अनुसार इटहरी २० स्थित चारकोसे झाडीमा प्र-१-०२९-००२ ख ०४५५ नम्बरको बस र को २२ प २१२५ को स्कुटर एकापसमा दुर्घटना भएको हो ।
शनिबार (आज) दिउँसो ११ बजेतिर इटहरी धरानको चारकोसे क्षेत्रमा पर्ने उक्त खण्डमा दुर्घटना हुँदा दुवैजनाको घटनास्थलमै मृत्यु भएको हो ।
प्रत्यक्षदर्शीको भनाइअनुसार इटहरीबाट धरानतर्फ बस जाँदै गरेको थियो । स्कुटर पनि सोही लेनबाट आइरहेको थियो । खासगरी गलत लेनको प्रयोगका कारण दुर्घटना भएको प्रत्यक्षदर्शीले जनाएका छन् ।
उनीहरू धरानतिरबाट इटहरीतर्फ आउँदै गरेको हुनसक्ने भएपनि गलत लेन प्रयोग गरेका कारण सडकमै जीवनले अन्तिम मोड लिएको हो ।
स्कुटर कसले चलाएको भन्नेबारे खुलिनसकेको सई नेपालले बताए ।
प्रत्यक्षदर्शीहरूले भनेअनुसार स्कुटर गलत लेनबाट आएको थियो। तीव्र गतिमा आउँदा बससँग ठोक्कियो र बसले स्कुटरलाई करिब ५० मिटरसम्म घिसार्यो।
प्रहरीका अनुसार दुर्घटनामा संलग्न बस चालकलाई इलाका प्रहरी कार्यालय इटहरीले नियन्त्रणमा लिएको छ।
धरान–इटहरी सडकखण्ड व्यस्त मार्ग हो। तर तीव्र गति, गलत लेन, र ट्राफिक नियमको उल्लंघन यहाँ सामान्यजस्तै भएको छ।
यसले हरेक वर्ष अनेकन जीवनको ज्यान लिने गरेको छ । दुवै शव हाल धरानस्थित बीपी प्रतिष्ठानको शव गृहमा राखिएको छ । प्रहरीले घटनाबारे थप अनुसन्धान भइरहेको जनाएको छ ।
Discussion about this post