मोरङ : मोरङको बूढीगङ्गा गाउँपालिकामा शुक्रबार राति भएका छुट्टाछुट्टै मोटरसाइकल दुर्घटनामा दुई जनाको ज्यान गएको छ भने एक जना गम्भीर घाइते भएका छन्।
बूढीगङ्गा–२ अमाही बोक्ला टोलस्थित भित्री सडकखण्डमा को ३५ प ५०३३ नम्बरको मोटरसाइकल अनियन्त्रित भई दुर्घटनाग्रस्त हुँदा नेमुवा–३ का ३५ वर्षीय विकासकुमार भगत गम्भीर घाइते भएका थिए। उपचारका लागि विराट शिक्षण अस्पताल पुर्याइए पनि राति चिकित्सकले उनलाई मृत घोषित गरेका थिए।
त्यसैगरी, राति नै बूढीगङ्गा–३ को कोशी लोकमार्गमा को २१ प ८६९२ नम्बरको मोटरसाइकल सडक डिभाइडरमा ठोक्किँदा पछाडि सवार विराटनगर–४ का ४२ वर्षीय कात्तिक विश्वास गम्भीर घाइते भए।
तत्काल उद्धार गरी कोशी अस्पताल पुर्याइए पनि उपचारकै क्रममा उनको मृत्यु भएको प्रहरीले जनाएको छ।
मोटरसाइकल चालक विराटनगर–४ का सञ्जय थान्दार गम्भीर घाइते भएका छन्।
दुवै दुर्घटनाबारे थप अनुसन्धान भइरहेको मोरङ प्रहरीले जनाएको छ।
Discussion about this post