इटहरी : कोशी प्रदेशसभाको प्रशासनिक र संसदीय गतिविधि अब मोरङको कटहरीस्थित फलफूल तथा तरकारी थोक बजारको भवनबाट सञ्चालन हुने भएको छ।
कटहरी गाउँपालिकाले औपचारिक पत्राचारमार्फत उक्त भवन प्रदेशसभाका लागि प्रयोग गर्न सहमति जनाएपछि वैकल्पिक रूपमा सो स्थान रोजिएको हो।
गत भदौ २४ गते ‘जेनजी’ आन्दोलनका क्रममा कोशी प्रदेशसभाका मुख्य भवन तथा कार्यलय कक्षमा तोडफोड, लुटपाट र आगजनी भएको थियो।
त्यसपछि संसदीय बैठक तथा नियमित प्रशासनिक प्रक्रिया पूर्ण रूपमा अवरुद्ध भएको थियो।
भवन क्षतिग्रस्त भई प्रयोगयोग्य नहुँदा प्रदेशसभा बैठक बस्न नसकेको र प्रशासनिक कामकाज विराटनगरस्थित मिडिया सेन्टरको साँघुरो कोठाबाट चलिरहेको अवस्थाले कार्यसम्पादनमा अवरोध परिरहेको थियो।
यसअघि विराटनगरको वीरेन्द्र सभागृहमा प्रदेशसभा सञ्चालन गर्ने तयारी भए पनि सभागृहको भाडा महँगो परेपछि प्रदेशसभा र प्रदेश सरकारले विकल्प खोज्दै कटहरीको तरकारी बजार भवन रोजेको हो।
कोशीका आन्तरिक मामिला तथा कानुन मन्त्री रेवतीरमण भण्डारीका अनुसार कटहरी गाउँपालिकाले उक्त भवन निःशुल्क रूपमा उपलब्ध गराउने भएको छ।
केही दिनभित्रै सोही भवनबाट प्रदेशसभाका सम्पूर्ण गतिविधि पुनःसञ्चालन हुने उनले बताए।
Discussion about this post