इटहरी : व्यस्त सहरको दैनिक जीवनबीच, इटहरीले साहित्यिक गतिविधिमा नयाँ आयाम थपेको छ। मंगलवार साँझ सम्पन्न पहिलो काव्य डबलीमा १३ जना कविहरूले आफ्नो कविता प्रस्तुत गर्दै सांस्कृतिक चेतना जगाए।
साँझ ५ः३० बजे नाट्यकर्मी सोनु जयन्तीले कविशिरोमणि लेखनाथ पौड्यालका कविताका हरफ वाचन गर्दै कार्यक्रम सुरू गरे।
विवश पोखरेलले ‘नकचराहरूको नाममा,’ पुरुण याख्याले ‘पाना खाली नै छ,’ गोपाल देवानले ‘लाल अञ्जान जी,’ मुकुन्द प्रयासले ‘भ्रमको महाकाव्य,’ सुदीप पाख्रिनले ‘बोध,’ केजी सुब्बाले ‘आम्रपाली,’ शीर्षकको कविता प्रस्तुत गरे।
यसैगरी टीका आत्रेयले ‘खोज,’ सीमा आभासले ‘स्मृति,’ करुणा राईले ‘नफर्किएको बादल,’ बद्री भिखारीले ‘हिँड्दाहिँड्दै,’ प्रज्वल पराजुलीले ‘एक थोपा पानी,’ मनु मञ्जिलले ‘पहाड र पहिरो’ र देवान किरातीले ‘सत्चालिस लाख लासहरू’ शीर्षकको कविता प्रस्तुत गरे।
संगीत संयोजन प्रकाश घिमिरेले गरेका थिए। आयोजकका अनुसार कार्यक्रम कुनै संस्था वा व्यक्ति विशेषको नभई स्थानीय कवि–लेखकहरूको स्वस्फूर्त पहलमा सञ्चालन गरिएको हो।
कवि मनु मञ्जिलले कविता समाजमा हृदयको प्रतिनिधित्व भएको बताए। कविता, कथा, गीत तथा नाटकले समाजको सांस्कृतिक विकासमा योगदान पुर्याउने उनले उदृत गरे।
मञ्जिलले भने, ‘जुन समाजमा कविता छैन, त्यो हृदय नभएको मानिसजस्तै हो। मानिससँग धन, पद र शक्तिले जतिसुकै ठूलो भएपनि जोसँग हृदय छैन, त्यो मानिस खासै उच्चस्तरको मानिस होइन, समाज पनि त्यस्तै हो।’
कथा, निबन्ध, गीत, नाटक र सिनेमा निर्माण हुनु कुनै सुन्दर काव्यजस्तै रहेको उनले बताए।
उनले थपे, ‘कविता ध्यान हो। ध्यानको अनुभूति गराउनका निम्ति पनि यो कार्यक्रमले बल दिनेछ।’
इटहरीमा आगामी हरेक दुई–दुई महिनामा काव्य डबलीलाई श्रृङ्खलाबद्ध रूपमा सञ्चालन गर्ने योजना रहेको छ।
शीतलहर र हुस्सुका बाबजुद पनि इटहरीमा काव्य डबलीको पहिलो श्रृङ्खला सम्पन्न भएसँगै यस किसिमको पहलले सहरमा साहित्य र सांस्कृतिक जीवनको पुनःजीवन सुरु गर्न सक्ने सम्भावना देखिएको छ।
खासगरी स्वस्फूर्त रूपमा सुरू भएको साहित्यिक पहलले सहरलाई नयाँ उचाईमा पुर्याउने विश्वास गरिएको छ।
Discussion about this post