इटहरी : नाट्यकर्मी तथा कवि भरत गुरागाईं ‘बर्बरिक’द्वारा लिखित कविता संग्रह ‘बर्बरिकका कविताहरू’ लोकार्पण गरिएको छ।
नाट्य लेखन, निर्देशन र कलामा पोख्त बर्बरिकले लेखेका कविताहरूको संग्रहको शुक्रवार इटहरीमा एक कार्यक्रमको आयोजना गरी लोकार्पण गरिएको हो ।
कवि मनु मञ्जिलसहित आमन्त्रित अतिथिहरूले संग्रहको लोकार्पण गरेका हुन् ।
हलेसी महादेव मिडिया प्रा.लि.ले प्रकाशनमा ल्याएको संग्रहभित्र ६३ वटा कविताहरू समेटिएका छन्।
इटहरी साहित्यिक समाजले आयोजना गरेको कार्यक्रममा कवि मञ्जिल, माया घर नेपालकी अध्यक्ष सुभद्रा प्याकुरेल, साहित्यकार प्रा.डा. भीमप्रसाद खतिवडा, साहित्यकार टीका आत्रेय, धरान उपमहानगरपालिका वडा नं. १३ का वडाध्यक्ष नेत्र काफ्ले, कवि मोहन कुमार तुम्बाङलगायतले मन्तव्य राखेका थिए।
इटहरी साहित्यिक समूहका अध्यक्ष हेमन्त गौतमको सभाध्यक्षतामा सम्पन्न भएको कार्यक्रममा श्रष्टा बर्बरिकले पहिलो चरणमा प्रकाशित कविता संग्रहको पुस्तक बिक्रीबाट संकलित रकम माया घरलाई उपलब्ध गराउने घोषणा गरे।
Discussion about this post