इनरुवा : सुनसरीको इनरुवा नगरपालिका–४ स्थित युनिक एकेडेमीमा कक्षा १० का विद्यार्थीबीच भएको विवादले उग्र रूप लिँदा विद्यालय परिसरमै अभिभावकको आक्रमण, विद्यार्थी आन्दोलन र राजमार्ग अवरुद्धको अवस्था सिर्जना भएको छ।
मङ्गलबार बिहान सरस्वती पूजाको चन्दाको विषयलाई लिएर कक्षा १० मा अध्ययनरत विद्यार्थीबीच विवाद भएको थियो। सोही क्रममा आफ्ना छोरालाई कुटपिट गरिएको दाबी गर्दै इनरुवा-४ का ४२ वर्षीय लालदेव ठाकुर विद्यालय पुगेका थिए।
ठाकुरले आफू सशस्त्र प्रहरी भएको भन्दै कक्षा १० का सौरम मेहता, सन्दीप मेहता लगायतका विद्यार्थीमाथि कुटपिट गरेको आरोप लगाइएको छ।
आफ्नो छोरालाई सोही कक्षाका विद्यार्थीले सरस्वती पूजाको चन्दाको विषयमा कुटपिट गरेको भन्दै ठाकुरले विद्यालयमा विद्यार्थी आक्रमण गरेको दाबी गरिएको छ ।
घटनापछि आक्रोशित विद्यार्थीहरूले ठाकुरविरुद्ध नाराबाजी गर्दै जिल्ला प्रहरी कार्यालय सुनसरी अगाडि धर्ना दिएका थिए।
प्रदर्शनकै क्रममा ठाकुरको प्रदेश नम्बर १-०२-००४९ प ५९९४ नम्बरको मोटरसाइकलमा आगजनी गरिएको छ।
विद्यार्थी आन्दोलनका कारण केही समय राजमार्ग अवरुद्ध भएको थियो भने प्रहरी कार्यालय परिसरमा समेत तनावपूर्ण अवस्था सिर्जना भएको थियो।
जिल्ला प्रहरी कार्यालय सुनसरीले घटनामा संलग्नमाथि अनुसन्धान र कारबाही प्रक्रिया अघि बढाउने आश्वासन दिएपछि सडक सञ्चालनमा आएको छ।
जिल्ला प्रहरी कार्यालय सुनसरीका प्रहरी नायब उपरीक्षक चन्द्रबहादुर खड्काका अनुसार आरोपित सशस्त्र प्रहरीको परिचर पदमा कार्यरत लालदेव ठाकुरसहित पाँच जनालाई नियन्त्रणमा लिएर घटनाबारे अनुसन्धान सुरु गरिएको छ।
Discussion about this post