धरान : धरान उप–महानगरपालिकामा लागूऔषधसहित चार जनालाई नियन्त्रणमा लिएको छ।
धरान–९ बगैचालाइन क्षेत्रमा लागूऔषध कारोबार भइरहेको भन्ने सूचनाका आधारमा अस्थायी प्रहरी चौकी श्यामचोकबाट खटिएको प्रहरी टोलीले स्थानीय २८ वर्षीय राजकुमार राईको कोठामा खानतलासी गरेको थियो।
सो क्रममा ट्रामाडोल २६० क्याप्सुल र स्पास्पेन २६० ट्याब्लेट फेला परेका छन्।
उक्त घटनामा संलग्न रहेको आरोपमा राजकुमार राईसँगै धरान–११ का २५ वर्षीय अभय थापा मगर र धरान–१० का १७ वर्षीय सौरभ राजधामीलाई समेत नियन्त्रणमा लिई इलाका प्रहरी कार्यालय धरानमा ल्याएर थप अनुसन्धान भइरहेको प्रहरीले जनाएको छ।
यसैगरी वडा प्रहरी कार्यालय धरान र अस्थायी प्रहरी चौकी विजयपुरबाट संयुक्त रूपमा खटिएको प्रहरी टोलीले धरान–१३ फुस्रेमा डेरा गरी बस्दै आएका २८ वर्षीय रोमन भुजेलको कोठामा पनि खानतलासी गरेको थियो।
धनकुटाको साँगुरीगढी गाउँपालिका–६ घर भएका भुजेलको कोठाबाट ब्राउनसुगर १.३९ ग्राम बरामद गरिएको प्रहरीले जनाएको छ।
बरामद लागूऔषधसहित भुजेललाई नियन्त्रणमा लिई इलाका प्रहरी कार्यालय धरानमा राखेर थप अनुसन्धान भइरहेको प्रहरीले जानकारी दिएको छ।
धरान क्षेत्रमा पछिल्लो समय लागूऔषध प्रयोग र कारोबार बढ्दै गएको गुनासो आइरहेका बेला प्रहरीले सूचनाका आधारमा लक्षित कारबाहीलाई तीव्र बनाएको जनाएको छ।
Discussion about this post