इटहरी : सुनसरीको कोशी गाउँपालिका–४ स्थित कोशी कटानमा स्कार्पिओ र मोटरसाइकल ठोक्किँदा एक जनाको मृत्यु भएको छ भने एक जना गम्भीर घाइते भएका छन्।
मंगलबार साँझ पूर्व–पश्चिम राजमार्गमा इनरुवाबाट भाण्टाबारीतर्फ आउँदै गरेको स १ च ९२१ नम्बरको स्कार्पिओले विपरीत दिशाबाट आउँदै गरेको मधेश प्रदेश ०६–००१ प ०९५२ नम्बरको मोटरसाइकललाई ठक्कर दिएको थियो।
दुर्घटनामा मोटरसाइकल चालक सप्तरीको विष्णुपुर नगरपालिका–२ बस्ने २८ वर्षीय सञ्जय साहको टाउकोमा गम्भीर चोट लागेर घाइते भएका थिए।
साथै मोटरसाइकल पछाडि सवार राजविराज बस्ने २५ वर्षीया पुष्पा साह पनि टाउको तथा हातखुट्टामा गम्भीर चोट लागेर घाइते भएकी छन्।
दुवै घाइतेलाई तत्काल उद्धार गरी उपचारका लागि जिल्ला अस्पताल इनरुवा पठाइएकोमा उपचारका क्रममा चालक सञ्जय साहलाई चिकित्सकले मृत घोषणा गरेका हुन्। पुष्पा साहको उपचार भइरहेको प्रहरीले जनाएको छ।
दुर्घटनामा संलग्न मोटरसाइकल प्रहरीको नियन्त्रणमा रहेको छ। स्कार्पिओ र चालक सप्तरीको बोदेबर्साइन नगरपालिका–६ बस्ने २५ वर्षीय रञ्जित कुमार चौधरीलाई इलाका प्रहरी कार्यालय लौकहीले नियन्त्रणमा लिएको छ।
उक्त दुर्घटनास्थल ट्राफिक प्रहरी पोस्ट कटानबाट करिब २ किलोमिटर पश्चिमतर्फ पर्दछ।
प्रारम्भिक अनुसन्धानका अनुसार स्कार्पिओ चालकले तीव्र गतिमा सवारी चलाउँदा सडकमा ध्यान नदिएकाले दुर्घटना भएको बताइएको छ।
घटनाबारे थप अनुसन्धान भइरहेको प्रहरीले जनाएको छ।
Discussion about this post