इटहरी : शिक्षा विकास तथा समन्वय इकाइ सुनसरीले हतारमा निर्णय गर्दा एकै छिनमा दुई पत्र सार्वजनिक गरेको छ ।
दुवै पत्र गलत रहेको छ । खासगरी शिक्षा विकास तथा समन्वय इकाइ सुनसरीले बिहीवार (आज) निम्न माध्यमिक तहका लागि स्थायी अध्यापन अनुमति पत्र रद्द गर्नेबारे एक सूचना सार्वजनिक गर्यो ।
जसमा कक्षा १२ मा २०० पूर्णांकको शिक्षा सम्बन्धी विषय अध्ययन नगरेका उम्मेदवारलाई प्रदान गरिएका निम्नमाध्यमिक तहका स्थायी अध्यापन अनुमति पत्र रद्द गर्ने व्यहोरा उल्लेख थियो ।
इकाइले निम्नमाध्यमिक तहको स्थायी अध्यापन अनुमति पत्र प्राप्त गर्नका लागि मान्यता प्राप्त शिक्षण संस्थाबाट सम्बन्धित विषयमा माध्यमिक शिक्षा परीक्षा (कक्षा १२) वा सो सरह उत्तीर्ण भई शिक्षा विषयमा कम्तीमा १० महिने तालिम पूरा गरेको वा २०० पूर्णांकको शिक्षा सम्बन्धी विषय सहित कक्षा १२ उत्तीर्ण गरेको हुनुपर्ने जनाएको थियो ।
तर, कतिपय विद्यालयहरूले कक्षा १२ मा १०० पूर्णांकको शिक्षा सम्बन्धी विषय मात्र अध्यापन गराएको र सोही आधारमा त्यस्ता उम्मेदवारलाई भूलवस स्थायी अध्यापन अनुमति पत्र वितरण भएको पाइएको जनाइएको थियो ।
खासगरी यसरी वितरण भइसकेका अनुमति पत्रहरू फिर्ता गर्न सम्बन्धितहरूलाई अनुरोध गरिएको थियो ।
तर, केहीबेरमा इकाइले पुनः सूचना जारी गरी अघिल्लो सूचना सच्याएको छ ।
जसमा भनिएको छ, ‘निम्नमाध्यमिक तहको स्थायी अध्यापन अनुमति पत्र प्राप्त गर्नका लागि मान्यता प्राप्त शिक्षण संस्थाबाट सम्बन्धित विषयमा माध्यमिक शिक्षा परीक्षा उत्तीर्ण (कक्षा १२) वा सो सरहको उत्तीर्ण गरी शिक्षा विषयमा कम्तीमा १० महिने तालिम पूरा गरेको वा २०० पूर्णांकको शिक्षा सम्वन्धी विषयसहित माध्यमिक शिक्षा परीक्षा उत्तीर्ण (कक्षा १२) गरेको हुनुपर्ने भन्ने परिपत्र प्राप्त भएता पनि कक्षा ११ र कक्षा १२ दुवैगरी कम्तीमा २०० पूर्णांकको शिक्षा सम्वन्धी विषय अध्ययन गरेका उम्मेदवारहरूलेसमेत अध्यापन अनुमति पत्र प्राप्त गर्न सक्ने भनी शिक्षक सेवा आयोगबाट जानकारी प्राप्त भएको हुँदा सोही बमोजिमको कागजातहरू पेश गरी स्थायी अध्यापन अनुमति पत्र बुझिलिन हुन अनुरोध छ ।’
दुवै पत्रमा इकाइ प्रमुख देवेन्द्रवहादुर मल्लले हस्ताक्षर गरेका छन् ।
इकाइले यसअघिको यस कार्यालयको च.नं.११२१ भनेर उल्लेख गरेपनि यसअघि भने च.नं. १११२ उल्लेख गरेको थियो । खासगरी हतारमा इकाइले निर्णय गर्नु र दुवै व्यहोरामा केही त्रुटि हुनुले इकाइको कार्यक्षमतामाथि प्रश्न उठाएको छ ।
Discussion about this post