तेह्रथुम : तेह्रथुमको लालीगुराँस नगरपालिकाले ‘बाँदर आतंक’ नियन्त्रणका लागि अनौठो निर्णय गर्दै जेठ १ गते नगरपालिकाभर सार्वजनिक बिदा दिने भएको छ।
कृषकले लगाएको अन्नबाली, तरकारी र फलफूल बाँदरले नष्ट गर्न थालेपछि नगरपालिका सामूहिक ‘बाँदर लखेट’ अभियानमै उत्रिएको हो।
नगर प्रमुख अर्जुन माबोहाङका अनुसार बाँदरको समस्याले किसान रातदिन खेतबारी कुरेर बस्न बाध्य भएका छन्। विद्यालय उमेरका बालबालिकासमेत पढाइ छाडेर बाली जोगाउन खटिनुपर्ने अवस्था सिर्जना भएको उनको भनाइ छ।
नगरपालिकाले जारी गरेको सूचनामा बाँदरको समस्या कृषि क्षतिमा मात्र सीमित नरहेको उल्लेख गर्दै यसले किसानको आय, परिवारको दैनिकी र बालबालिकाको शिक्षामै असर पुर्याएको जनाएको छ।
यसैलाई मध्यनजर गर्दै जेठ १ र २ गते सामूहिक रूपमा बाँदरलाई गाउँ–बस्तीबाट लखेटेर नगरपालिकाको सीमाना बाहिर पठाउने अभियान सञ्चालन गरिने भएको छ। अभियानमा कृषक, जनप्रतिनिधि, कर्मचारी तथा सर्वसाधारणलाई सहभागी हुन आह्वान गरिएको छ।
नगरपालिकाले बाँदर नियन्त्रणका लागि विभिन्न स्थानमा अस्थायी संरचना निर्माण गरी हेरालुसमेत खटाएको जनाएको छ। वडा नम्बर ८ को मेघा पुछार, वडा नम्बर ६ र ८ को संगमस्थल नागेश्वरी तथा वडा नम्बर ५ को सिंहथाप पुछार क्षेत्रमा अहिले चार जना हेरालु परिचालन गरिएको छ।
पछिल्लो समय पहाडी जिल्लामा बाँदरका कारण ठूलो चुनौती बन्दै गएको छ। मकै, आलु, फलफूल र तरकारी खेतीमा क्षति बढेपछि कतिपय किसान खेतीपाती नै छाड्न बाध्य भएको गुनासोसमेत बढिरहेको छ।
Discussion about this post